ایکس صارفین کا مفت بلیو ٹک بحال ہونا شروع

دنیا کی مقبول ترین مائیکرو بلاگنگ ویب سائٹ ایکس (سابقہ ٹوئٹر) نے اپنے کچھ صارفین کو مفت بلیو ٹکس واپس کر دیے ہیں۔

ایکس کے مالک ایلون مسک نے 2022 میں ٹوئٹر کو 44 ارب ڈالر میں خریدا تھا جس کے بعد کئی بڑی تبدیلیاں کی گئیں جس پر سائٹ کو شدید تنقید کا بھی سامنا کرنا پڑا۔

ان تبدیلیوں میں سے ایک یہ تھی کہ ایلون مسک نے ایکس پر بلیو ٹک حاصل کرنے کے لئے فیس مقرر کی تھی، جس کا مطلب ہے کہ جو صارفین اپنے اکاؤنٹ کی تصدیق چاہتے تھے انہیں فیس ادا کرنا ہوگی۔

لیکن اب ایکس نے اچانک کچھ صارفین کے مفت بلیو چیک کو مفت میں بحال کر دیا ہے، جس سے وہ خوش ہیں۔

ایکس کی جانب سے جاری بیان کے مطابق مفت سبسکرپشن ایکس کے بااثر صارفین کو دی جاتی ہے جن کے نیٹ ورکنگ سائٹ پر زیادہ فالوورز ہیں۔

ایکس کے مطابق ان تمام اکاؤنٹس میں تعریفی سبسکرپشن ختم کرنے کا آپشن بھی ہوگا۔

یہاں یہ بات بھی قابل ذکر ہے کہ ایلون مسک نے چند روز قبل اعلان کیا تھا کہ 2500 سبسکرائبرز والے پیڈ اکاؤنٹس مفت میں پریمیم فیچرز حاصل کرسکیں گے۔

اس کے علاوہ 5,000 سبسکرائبرز والے ادا شدہ اکاؤنٹس کو پریمیم پلس فیچرز مفت ملیں گے۔