نوشکی: 9 افراد کو بس سے اغواء کے بعد قتل کردیا گیا

بلوچستان کے ضلع نوشکی میں نا معلوم افراد کی جانب سے فائرنگ کے 2  مختلف واقعات میں 11 افراد جاں بحق اور 3 زخمی ہوئے۔

ڈپٹی کمشنر نوشکی نے ذرائع ابلاغ کو بتایا کہ نوشکی کے مقام پر قومی شاہراہ پر ایک بس سے مسلح افراد نے 9 مسافروں کو اغوا کیا اور  انہیں قریبی پہاڑوں کی جانب لے گئے۔

ضلعی انتظامیہ کا کہنا ہے کہ مسافر بس کوئٹہ سےتفتان جارہی تھی۔

بعد ازاں پولیس نے بتایا کہ نوشکی سے اغوا کیے جانے والے 9 مسافروں کی لاشیں پہاڑی کے قریب پل کے نیچے سے ملیں، مرنے والوں کا تعلق منڈی بہاؤ الدین،گوجرانوالہ اور وزیرآباد سے ہے۔

دوسری جانب پولیس کے مطابق لاشیں قومی شاہراہ کے قریبی پہاڑی علاقے میں پل کے نیچے سے ملی ہیں،مقتولین کا تعلق پنجاب سے بتایا جارہا ہے۔
پولیس نے بتایا کہ مسلح افراد نے سلطان چڑھائی کے قریب بس روک کر مسافروں کو اغوا کیا تھا، مسلح افراد کی ایم پی اے غلام دستگیر کے بھائی کی گاڑی روکنے کی بھی کوشش کی۔
گاڑی کےنہ رکنے پر مسلح افراد کی جانب سے فائرنگ کی گئی ،فائرنگ سے ٹائر پھٹنے سے گاڑی الٹ گئی، 2افراد جاں بحق،4زخمی ہوئے ہیں۔

ڈپٹی کمشنر کے مطابق زخمی افراد میں غلام دستگیر بادینی کے بھائی بھی شامل ہیں۔