پیپلز پارٹی کا وفاقی حکومت میں شمولیت کا فیصلہ

پاکستان مسلم لیگ (ن) کی بڑی اتحادی جماعت پاکستان پیپلز پارٹی نے دو صوبوں میں اپنے گورنرز کی تقرری کے بعد وفاقی حکومت میں شامل ہونے کا اصولی فیصلہ کیا ہے۔

پیپلز پارٹی کو 8 وزارتیں ملنے کا امکان ہے تاہم وزارتوں کے انتخاب اور تعداد کے حوالے سے حتمی فیصلہ ہونا ابھی باقی ہے۔

اگرچہ اسلام آباد میں موجود پارٹی کے اہم ذرائع کی جانب سے وفاقی حکومت میں شمولیت کے حوالے سے کوئی باضابطہ اعلان یا تصدیق نہیں کی گئی ہے تاہم اس فیصلے کو بالکل بھی مسترد نہیں کیا گیا ہے جس سے فی الوقت اسے امکانات کے طور پر ظاہر کیا جا رہا ہے۔

ذرائع کے حوالے سے مقامی ٹی وی کی رپورٹ کے مطابق یہ پیش رفت اسلام آباد میں وزیراعظم شہباز شریف اور پیپلز پارٹی کے چیئرمین بلاول بھٹو کے درمیان ون آن ون ملاقات کے بعد سامنے آئی ہے۔

بتایا گیا ہے کہ دونوں رہنماؤں کے درمیان ہونے والی ملاقات میں دونوں صوبوں کے گورنرز کی نامزدگی کے معاملے پر تبادلہ خیال کیا گیا۔ مسلم لیگ (ن) کے ذرائع کے مطابق وزیراعظم شہباز شریف نے بلاول بھٹو کو ملاقات میں وفاقی حکومت میں شامل ہونے کی باضابطہ دعوت دی۔

ایک سوال کے جواب میں مذکورہ ذرائع نے پارٹی چیئرمین بلاول بھٹو کی بطور وزیر خارجہ سابقہ کارکردگی کو ملکی خارجہ امور میں کارکردگی کا شاندار دور قرار دیا۔ مجوزہ فیصلے پر عمل درآمد کے نتیجے میں پیپلز پارٹی کو آٹھ وزارتیں مل سکتی ہیں جبکہ روبینہ خالد کو بینظیر انکم سپورٹ پروگرام کی چیئرپرسن مقرر کرنے کا فیصلہ پہلے ہی کیا جا چکا ہے۔

واضح رہے کہ 8 فروری کو ہونے والے عام انتخابات کے بعد پاکستان پیپلز پارٹی اور پاکستان مسلم لیگ (ن) نے دیگر جماعتوں کی حمایت سے مرکز میں حکومت بنانے کے لیے تعاون پر اتفاق کیا تھا۔

اس وقت چیئرمین بلاول بھٹو زرداری نے کہا تھا کہ وہ وفاقی حکومت کا حصہ نہیں بنیں گے اور مسلم لیگ (ن) کے وزیر اعظم کے امیدوار کو ووٹ دیں گے۔