پی ڈی ایم جلسے سے حکومت پر کوئی سیاسی فرق نہیں پڑتا: کامران بنگش

پشاور: کامران بنگش نے کہا کہ پی ڈی ایم جلسے سے حکومت پر کوئی سیاسی فرق نہیں پڑتا، کورونا کیسز بڑھے تو ذمہ دار پی ڈی ایم رہنما ہوں گے۔

معاون خصوصی برائے خیبرپختونخوا کامران بنگش کا جی ٹی وی سے خصوصی گفتگو کرتے ہوئے کہنا تھا کہ پی ڈی ایم جلسے سے حکومت پر کوئی سیاسی فرق نہیں پڑتا،پی ڈی ایم شوق سے جلسے کرے۔

کامران بنگش کا کہنا تھا کہ جلسے سے کورونا وائرس پھیلنے کا خدشہ ہے، کورونا سے حفاظت کے لئے حکومت متحرک ہے، سیکورٹی فراہم کرنا حکومت کی ذمہ داری ہے۔

یہ بھی پڑھیں: خیبر پختونخوا حکومت کا پی ڈی ایم کے پشاور جلسے میں رکاوٹ نہ ڈالنے کا عندیہ

ان کا کہنا تھا کہ پی ڈی ایم کو غیر جمہوری طریقے سے روکنا نہیں چاہتے، اپوزیشن نے 2015 میں ہماری ریلی غیر جمہوری طریقے سے روکی تھی۔

معاون خصوصی نے کہا کہ جلسے کے بعد کورونا کیسز بڑھے تو ذمہ دار پی ڈی ایم رہنما ہوں گے، کیسز بڑھنے پر پی ڈی ایم کے خلاف قانونی کارروائی کی جائے گی۔

کامران بنگش کا کہنا تھا کہ کوئٹہ اور پشاور کے حوالے سے تھریٹ الرٹ جاری ہو چکا ہے، حکومت جلسے کے لئے مکمل سیکورٹی فراہم کرے گی۔