سوڈانی متحارب دھڑوں کے درمیان سات روزہ جنگ بندی کے معاہدے پر دستخط

مذاکرات کے سہولت کاروں کا کہنا ہے کہ معاہدے پر دستخط کے 48 گھنٹے بعد سات روزہ جنگ بندی نافذ ہو جائے گی اور اسے امریکہ اور سعودی عرب نافذ کریں گے۔

امریکہ اور سعودی عرب کے مشترکہ بیان کے مطابق سوڈان میں متحارب دھڑوں نے سعودی عرب کے شہر جدہ میں مذاکرات کے بعد سات روزہ جنگ بندی پر اتفاق کیا ہے۔ سابقہ جنگ بندی معاہدوں کی خلاف ورزی کی گئی۔ تاہم، اس معاہدے کو امریکی-سعودی اور بین الاقوامی تعاون یافتہ مانیٹرنگ میکانزم کے ذریعے نافذ کیا جائے گا۔

اس معاہدے میں انسانی امداد کی تقسیم، ضروری خدمات کی بحالی اور اسپتالوں اور ضروری عوامی سہولیات سے افواج کے انخلاء کا بھی مطالبہ کیا گیا ہے۔

اس حوالے سے امریکی وزیر خارجہ انٹونی بلنکن نے کہا ہے کہ اسلحے کو خاموش کرنے اور انسانی بنیادوں پر بلا روک ٹوک رسائی کی اجازت دینے کا وقت گزر چکا ہے۔ میں دونوں فریقوں سے درخواست کرتا ہوں کہ وہ اس معاہدے کو برقرار رکھیں، دنیا کی نظریں ان پر ہیں۔

میڈیا رپورٹ کے مطابق معاہدہ تنازعہ کو منجمد کر دے گا اور متحارب فریقوں کو اپنی موجودہ پوزیشن پر برقرار رہنے کی اجازت ہوگی۔

یہ بھی پڑھیں : سوڈانی افواج کے آر ایس ایف کے ٹھکانوں پر فضائی حملے، خوراک کی کمی

رپورٹ میں بتایا گیا کہ ریپڈ سپورٹ فورسز صدارتی محل کا کنٹرول رکھیں گی اور فوج اپنے ہیڈ کوارٹر، مسلح افواج کی جنرل کمان کا کنٹرول رکھتی ہے۔ جہاں تک ہوائی اڈے کا تعلق ہے، وہاں کی سہولیات پر آر ایس ایف کا زیادہ کنٹرول ہے، اس لیے وہ اسے برقرار رکھیں گے۔

سوڈانی فوج نے معاہدے کے حوالے سے بتایا کہ ریپڈ سپورٹ فورسز کے ساتھ معاہدہ تکنیکی اور فوجی پہلوؤں تک محدود ہے اور اس میں سیاسی مسائل شامل نہیں ہیں۔ جنگ بندی کی مدت سات دن ہے، اور یہ پیر کی شام ٹھیک نو بج کر پینتالیس منٹ پر نافذ ہو جائے گی۔

یہ معاہدہ عارضی جنگ بندی کے انتظامات اور عام شہریوں کی نقل و حرکت کی آزادی کے طریقہ کار کے فوجی اور تکنیکی پہلوؤں تک محدود ہے۔ بیان میں کہا گیا ہے کہ اس جنگ بندی کا مقصد لوگوں کو آر ایس ایف کے تشدد اور خلاف ورزیوں سے بچانا ہے۔

بیان میں یہ بھی کہا گیا کہ جنگ بندی کا مقصد کسی سیاسی صورتحال پر بات کیے بغیر اسپتالوں کو خالی کرانا اور خدمات کی سہولیات اور متعلقہ امور کو برقرار رکھنا ہے۔