پاکستان کسی بلاک کا حصہ نہیں : ترجمان دفتر خارجہ

اسلام آباد : ممتاز زہرہ بلوچ کا کہنا ہے کہ پاکستان کے امریکا کے ساتھ کئی دہائیوں سے زبردست تعلقات ہیں، کسی بلاک کا حصہ نہیں ہیں۔

ترجمان دفتر خارجہ ممتاز زہرہ بلوچ نے ہفتہ وار بریفنگ میں کہا کہ پاکستان بھارت کی جانب سے سرینگر میں منعقدہ جی 20 اجلاس کو مسترد کرتا ہے۔ جموں کشمیر عالمی سطح پر متنازعہ علاقہ ہے۔ ایسی کانفرنس کروانا کشمیر کے لوگوں کے ساتھ دھوکہ ہے۔

یہ بھی پڑھیں : شرپسندوں نے شہداء کی بے حرمتی کر کے نظریہ پاکستان پر حملہ کیا : وزیر اعظم

انہوں نے کہا کہ بھارت مقبوضہ کشمیر میں حالات کے نارمل ہونے کا ڈھونگ رچا رہا ہے۔ پاکستان، چین، سعودی عرب، ترکی، مصر اور عمان کا اس کانفرنس میں شرکت نہ کرنے کے فیصلے کا خیر مقدم کرتے ہیں۔

ان کا کہنا تھا کہ پاکستان اور افغانستان ہر فورم پر رابطے میں ہیں۔ کسی بلاک کا حصہ نہیں ہیں۔ پاکستان کے امریکا کے ساتھ کئی دہائیوں سے زبردست تعلقات ہیں۔ دنیا بھر کے ممالک کے ساتھ شاندار تعلقات ہیں۔ پاکستان کی چین کے ساتھ اسٹریٹجک پارٹنر شپ ہے۔