دنیا تنازعات میں پھنسے شہریوں کے تحفظ میں ناکام ہے : سربراہ اقوام متحدہ

انتونیو گوتیرس کا کہنا ہے کہ تنازعات میں پھنسے لوگوں کی ہلاکتوں کی تعداد 50 فیصد سے زائد ہوگئی ہے، دنیا شہریوں کو تحفظ فراہم کرنے میں ناکام ہو رہی ہے۔

اقوام متحدہ کے سیکرٹری جنرل انتونیو گوتیرس نے یوکرین اور سوڈان میں شہریوں کی ہلاکتوں، ایتھوپیا میں اسکولوں کو تباہ کرنے اور شام میں پانی کے بنیادی ڈھانچے کو پہنچنے والے نقصان کی مثالوں کا حوالہ دیتے ہوئے سلامتی کونسل کو بین الاقوامی انسانی قانون میں درج شہریوں کے تحفظ کے لیے اپنے وعدوں پر عمل کرنے پر زور دیا ہے۔

انہوں نے کہا کہ جنگی علاقوں کے بارے میں اقوام متحدہ کی تحقیق سے ظاہر ہوتا ہے کہ گزشتہ سال آبادی والے علاقوں میں دھماکہ خیز ہتھیاروں سے متاثر ہونے والے 94 فیصد عام شہری تھے، جب کہ 117 ملین سے زائد افراد کو بنیادی طور پر جنگ اور عدم تحفظ کی وجہ سے شدید بھوک کا سامنا کرنا پڑا۔

یہ بھی پڑھیں : سوڈانی متحارب دھڑوں کے درمیان سات روزہ جنگ بندی کے معاہدے پر دستخط

ان کا کہنا تھا کہ دنیا شہریوں کو تحفظ فراہم کرنے میں ناکام ہو رہی ہے، کیونکہ تنازعات میں پھنسے لوگوں کی ہلاکتوں کی تعداد پچھلے سال کے مقابلے میں 50 فیصد سے زیادہ بڑھ گئی ہے۔ گزشتہ سال دنیا بھر میں 12 تنازعات میں تقریباً 17,000 شہری ہلاکتیں ریکارڈ کی گئیں، جو کہ 53 فیصد اضافہ ہے۔

اقوام متحدہ کے سربراہ نے مزید کہا کہ قانون کو نظر انداز کرنا قانون کو کمزور کر دیتا ہے۔ اس کا احترام یقینی بنانے کے لیے ہمیں کارروائی اور احتساب کی ضرورت ہے۔ اور اس کا انحصار سیاسی ارادے پر ہے۔ امن تحفظ کی بہترین شکل ہے۔

انتونیو گوتیرس کا یہ بھی کہنا تھا کہ دنیا بھر میں، تصادم، تشدد، انسانی حقوق کی خلاف ورزیوں اور ظلم و ستم کی وجہ سے اپنے گھروں سے مجبور ہونے والے پناہ گزینوں کی تعداد 100 ملین تک پہنچ گئی ہے۔