ہم نے سابقہ حکومتوں کے لئے گئے 10 ارب ڈالر واپس کئے: مشیر خزانہ

کراچی: مشیر خزانہ عبدالحفیظ شیخ کا کہنا ہے کہ پی ٹی آئی حکومت کو زبوں حال معیشت ملی، ہم نے سابقہ حکومتوں کے لئے گئے 10 ارب ڈالر کے قرضے واپس کئے، عمران خان چاہتے ہیں اچھے لوگ اوپر آئیں۔

کراچی میں تقریب سے خطاب کرتے ہوئے مشیر خزانہ حفیظ شیخ کا کہنا تھا کہ پی ٹی آئی حکومت کو زبوں حال معیشت ملی، قرضوں میں ڈوبے ہوئے پاکستان کو وزیراعظم کی زیر قیادت مشکل معاشی حالات سے نکالا، عمران خان چاہتے ہیں اچھے لوگ اوپر آئیں، پاکستان میں اداروں کو بہتر کیا جارہا ہے۔

حفیظ شیخ نے کہا کہ ہم نے سابقہ حکومتوں کے لئے گئے 10 ارب ڈالر کے قرضے واپس کئے، ملکی برآمدات بڑھانے کے لیے موثر اقدامات اٹھائے گئے، حکومت نے بزنس فرینڈلی ماحول کو فروغ دیا، اس حکومت سے زیادہ کوئی حکومت بزنس فرنڈلی نہیں ہے، اب بیرونی سرمایہ کاری میں نمایاں اضافہ ہورہا ہے، گزشتہ 6 ماہ کے دوران اسٹیٹ بینک سے کوئی قرض نہیں لیا، ایکسچینج ریٹ پچھلے کئی ماہ سے مستحکم ہے، 5 ماہ میں پٹرولیم مصنوعات کی قیمتوں میں اضافہ نہیں کیا گیا، بجٹ کم ہونے کے باوجود غریبوں کی مدد کریں گے۔

یہ بھی پڑھیں: زرمبادلہ کے مجموعی ذخائر 17 ارب 59 کروڑ ڈالرز پر پہنچ گئے

مشیر خزانہ کا کہنا تھا کہ معاشی اصلاحات کے دوران بہت سی مشکلات پیش آئیں، لیکن اب ہماری معاشی پالیسیوں کے مثبت اثرات آنا شروع ہوگئے ہیں، عالمی مالیاتی ادارے ملکی معاشی کارکردگی کے معترف ہیں، اور ایشیائی ترقیاتی بینک (اے ڈی بی) نے پاکستان کو زیادہ مدد فراہم کرنے کیلئے خصوصی آلات بنائے ہیں۔