عرب کے ایک ملک میں پہلی اے آئی نیوز اینکر متعارف کرادی گئی

آرٹی فیشل انٹیلی جنس (اے آئی) ٹیکنالوجی کو کچھ ممالک میں نیوز اینکر کے کام کے لیے بھی استعمال کیا جارہا ہے، تاہم اب اس میں عرب ملک بھی شامل ہوگیا ہے۔

چین اور بھارت سمیت کئی ممالک میں اس ٹیکنالوجی کو میڈیا اداروں کی جانب سے استعمال کیا جا رہا ہے۔ اب اس فہرست میں عرب ملک کویت کا نام بھی شامل ہوگیا ہے۔

کویت کے ایک میڈیا ادارے نے اے آئی ٹیکنالوجی کی مدد سے تیار کی گئی ورچوئل اینکر کو متعارف کرایا ہے۔

یہ بھی پڑھیں: اب خبریں پڑھنے کیلئے روبوٹ نیوز اینکر پیش کردی گئی

کویت نیوز ویب سائٹ کی جانب سے Fedha نامی اس نیوز اینکر کی جھلک ٹوئٹر اکاؤنٹ پر ایک ویڈیو میں پیش کی گئی۔

اس ویڈیو میں ایک خاتون یہ کہتی ہے کہ ‘میں Fedha کویت کی پہلی اے آئی ٹیکنالوجی پر مبنی اینکر ہوں، آپ کونسی خبروں کو ترجیح دیتے ہیں، ہم آپ کی رائے سننا چاہتے ہیں’۔

أول مذيعة في #الكويت تعمل بالذكاء الاصطناعي

• #فضة.. مذيعة #كويت_نيوز الافتراضية

• ما هي نوعية الأخبار التي تفضلونها بتقديم #فضة زميلتنا الجديدة؟ .. شاركونا آراءكم pic.twitter.com/VlVjasSdpb

— كويت نيوز (@KuwaitNews) April 8, 2023

کویت نیوز ویب سائٹ وہاں کے ایک انگلش اخبار کویت ٹائمز سے منسلک ہے اور اس کے عہدیدار عبداللہ بوفتان نے بتایا کہ اے آئی ٹیکنالوجی کی آزمائش سے نئے اور تخلیقی مواد کو پیش کرنے میں مدد ملے گی۔

انہوں نے بتایا کہ مستقبل میں یہ اے آئی نیوز اینکر ہماری سائٹ کے ٹوئٹر اکاؤنٹ پر خبرنامے پیش کرے گی۔