پاک بھارت ٹاکرا: احمدآباد شہر ’ نو ڈرون زون‘ قرار

احمد آباد: پاک بھارت کی وجہ سے سکیورٹی خدشات کو مد نظر رکھتے ہوئے شہر کو ’ نو ڈرون زون‘ قرار دے دیا گیا ہے۔

بھارتی میڈیا کے مطابق احمد آباد پولیس کی جانب سے آج نریندر مودی اسٹیڈیم میں پاک بھارت میچ کے دوران شہر کو ’نو ڈرون زون‘ قرار دینے کا نوٹیفکیشن جاری کردیا ہے۔

احمدآباد پولیس کی جانب سے شہر پر آج ڈرون کے اڑانے کے ساتھ ہاٹ بلون اور جنگی جہاز اڑانے پر بھی پابندی عائد کی گئی ہے۔

یہ بھی پڑھیں: بھارت کے خلاف میچ کے لیے پر اعتماد اور پرجوش ہیں: کپتان بابر اعظم

نوٹیفکیشن میں کہا گیا ہے کہ یہ پابندی سکیورٹی کے پیش نظر لگائی گئی ہے کیونکہ دہشتگرد تنظیمیں یا سماج دشمن عناصر میچ کے دوران چھوٹے طیاروں یا ڈرونز کا استعمال کرکے کرکٹرز اور تماشائیوں کے لیے خطرہ بن سکتے ہیں۔

میڈیا رپورٹس کے مطابق نوٹیفکیشن میں پولیس، سکیورٹی ایجنسیوں، گجرات کرکٹ ایسوسی ایشن اور بی سی سی آئی کو پابندی سے مستثنیٰ قرار دیا گیا ہے۔