پاکستانی اداکار وہاج علی ایشیا کی 10 مقبول ترین شخصیات میں شامل

معروف پاکستانی اداکار وہاج علی ایشیا کی 10 مقبول ترین شوبز شخصیات میں شامل ہوگئے ہیں۔

اداکار وہاج علی کو برطانیہ کے ایک مشہور اخبار نے ’نمبر ون پاکستانی اسٹار‘ قرار دے دیاہے۔

برطانوی میگزین ایسٹرن آئی کی جانب سے 50 بہترین ایشیائی شخصیات کی ایک فہرست شائع کی گئی ہے جس میں فلم، ٹیلی ویژن، موسیقی، ادب اور سوشل میڈیا سمیت مختلف شعبوں کے افراد کو شامل کیا گیا ہے۔

اس فہرست میں پاکستان کے مقبول اداکار وہاج علی اپنی اداکاری کے سبب نویں نمبر پر ہیں۔

وہاج علی ٹاپ 50 ایشین سیلیبریٹیزکی فہرست میں سرِ فہرست واحد پاکستانی ہیں، اُنہوں نے اپنی بہترین اور غیر معمولی پرفارمنس سے کئی ہالی ووڈ اور بالی ووڈ کی مشہور شخصیات کو پیچھے چھوڑ دیا۔

فہرست میں وہاج علی کے علاوہ دیگر پاکستانی فنکار بھی شامل ہیں جب کہ ٹاپ 50 ایشین سیلیبریٹیز کی فہرست میں بالی ووڈ کنگ شاہ رخ خان پہلے نمبر پر موجود ہیں۔

رپورٹ کے مطابق برطانوی اخبار کے لیے یہ فہرست ترتیب دینے والے انٹرٹینمنٹ ایڈیٹر اسجد نذیر نے وہاج علی کی تعریف کرتے ہوئے کہا کہ وہاج علی نے یہ ثابت کیا کہ وہ موجودہ دور کے بہترین پاکستانی اداکاروں میں سے ایک ہیں جنہوں نے سال بھر زبردست کارکردگی دکھائی اور مستقبل کے لیے شاندار کام کی بنیاد رکھی۔

میڈیا کے مطابق عالمی شہرت یافتہ بالی وڈ کے کنگ شاہ رخ خان نے فلم ’پٹھان‘ اور ’جوان‘ کی باکس آفس پر شاندار کامیابی کے بعد اس فہرست میں پہلی پوزیشن حاصل کی ہے۔

اسجد نذیر نے زوال پزیر بھارتی سنیما پر رواں سال شاہ رخ خان کی ایک کے بعد ایک دو فلموں کی باکس آفس پر کامیابی سے پڑنے والے مثبت اثرات پر روشنی ڈالتے ہوئے کہا کہ نئی تاریخ بنانے والے سپر اسٹار شاہ رخ خان نے اپنی شاندار کامیابی سے سب کو گرہن لگا دیا اور عالمی سطح پر موجود فلمی شائقین کو یاد دلایا کہ زوال پزیر بالی ووڈ میں ابھی بھی بہت قابلیت ہے۔

واضح رہے کہ برطانوی اخبا رایسٹرن آئی کی ’ٹاپ 50 ایشین سیلیبریٹیز‘ کی فہرست میں شامل دیگر پاکستانی نژاد شوبز شخصیات میں رِض احمد، سجل علی، عروج آفتاب، یمنیٰ زیدی، شہزاد لطیف، حدیقہ کیانی، احد رضا میر، معاذ رضوان اور بلال عباس خان شامل ہیں۔

یہ پڑھیں : اداکارہ صحیفہ جبار کاخودکشی کی کوشش کرنے کا انکشاف