امریکہ تائیوان سے متعلق انتہائی خطرناک اشارے بھیج رہا ہے : چین

واشنگٹن : امریکہ اور چین کے درمیان تناؤ میں کمی ہوتی نظر نہیں آرہی، چین کا کہنا ہے کہ  واشنگٹن تائیوان سے متعلق انتہائی غلط اور خطرناک اشارے بھیج رہا ہے۔

ایک امریکی عہدیدار نے نامہ نگاروں کو بتایا کہ جمعہ کو نیویارک میں اقوام متحدہ کی جنرل اسمبلی کے حاشیے پر امریکی وزیر خارجہ انٹونی بلنکن اور چینی وزیر خارجہ وانگ یی کے درمیان 90 منٹ کی براہ راست بات چیت کا مرکز تائیوان تھا۔

امریکی انتظامیہ کے سینئر اہلکار نے کہا کہ سیکریٹری نے واضح کیا کہ ہماری ون چائنا پالیسی میں کوئی تبدیلی نہیں آئی ہے، امن و استحکام کو برقرار رکھنا انتہائی اہم ہے۔

یہ بھی پڑھیں : امریکہ کی روس کے ساتھ روابط پر ایرانی ایئرلائنز کے تین طیاروں پر پابندی

چین کی وزارت خارجہ نے میٹنگ کے بارے میں ایک بیان میں کہا کہ واشنگٹن تائیوان سے متعلق انتہائی غلط اور خطرناک اشارے بھیج رہا ہے۔ تائیوان کی آزادی کی سرگرمیاں جتنی زیادہ ہوں گی، پرامن تصفیے کے امکانات اتنے ہی کم ہوں گے۔

وزارت نے وانگ کا حوالہ دیتے ہوئے کہا کہ تائیوان کا مسئلہ چین کا اندرونی معاملہ ہے اور امریکہ کو اس میں مداخلت کرنے کا کوئی حق نہیں ہے کہ اسے حل کرنے کے لیے کیا طریقہ استعمال کیا جائے گا۔

چینی سرکاری میڈیا کا کہنا ہے کہ بلنکن کے ساتھ وانگ کی ملاقات میں تائیوان کے ساتھ امریکہ کے غلط رویے پر چین کے موقف پر توجہ دی گئی۔ ہمیں واضح طور پر تائیوان کی آزادی کی مخالفت اور اسے روکنا چاہیے۔

وائٹ ہاؤس نے اصرار کیا ہے کہ اس کی تائیوان پالیسی میں کوئی تبدیلی نہیں آئی ہے، لیکن چین نے کہا کہ بائیڈن کے ریمارکس نے ان لوگوں کو غلط اشارہ دیا ہے جو آزاد تائیوان کے خواہاں ہیں۔