غیر ملکی حکومتوں کو امریکی راز فروخت کرنے کا الزام، تین افراد پر فرد جرم عائد

واشنگٹن : امریکی عدالت نے غیر ملکی حکومتوں کو امریکی راز فروخت کرنے کے الزام میں تین افراد پر فرد جرم عائد کردی ہے۔

امریکی نیشنل سیکیورٹی ایجنسی میں کام کرنے والے سائبر ماہر اور ایک آرمی ڈاکٹر اور اس کی اہلیہ پر جمعرات کو الگ الگ مقدمات میں غیر ملکی حکومتوں کو امریکی راز فروخت کرنے کے الزام میں فرد جرم عائد کی گئی ہے۔

نیشنل سیکیورٹی ایجنسی میں کام کرنے والے سائبر سیکورٹی کے ماہر 30 سالہ جیریہ سیبسٹین ڈالکے نے جون کے آخر میں خاندانی مسائل کا حوالہ دیتے ہوئے اچانک استعفیٰ دے دیا، اس نے این ایس اے میں چار ہفتوں سے بھی کم وقت گزارا۔

یہ بھی پڑھیں : امریکی جوڑے کا ملک کے جوہری راز غیر ملکیوں کو بیچنے کا اعتراف

این ایس اے میں کام کے دوران اس نے سرفہرست خفیہ دستاویزات پرنٹ کیں اور چھوڑنے کے بعد اس نے ان کو انکرپٹڈ آن لائن کمیونیکیشنز میں فروخت کرنے کی پیشکش کی، جسے وہ غیر ملکی حکومت کا ایجنٹ سمجھتا تھا، لیکن وہ دراصل ایک ایف بی آئی ایجنٹ تھا۔

ملزم پر جاسوسی ایکٹ کی تین خلاف ورزیوں کا الزام عائد کیا گیا ہے، جرم ثابت ہونے پر اسے موت یا عمر قید کی ممکنہ سزا کا سامنا ہے۔

دوسرے کیس میں امریکی فوج کے ایک ڈاکٹر، میجر جیمی لی ہنری اور ان کی اہلیہ، اینا گیبریلین، جو جانز ہاپکنز یونیورسٹی میں اینستھیزیولوجی کی انسٹرکٹر ہیں، پر امریکی فوج اور سرکاری اہلکاروں کی صحت کی معلومات روس کو فروخت کرنے کی پیشکش کرنے کا الزام عائد کیا گیا تھا۔ سازش کا الزام ثابت ہونے پر 20 سال قید ہو سکتی ہے۔