پی ٹی آئی کی قیادت کو شہباز گل کے بیان سے الگ ہونا چاہیے، بیان مناسب نہیں : پرویز الہٰی

لاہور : وزیر اعلیٰ پنجاب کا کہنا ہے کہ ادارے ہمارے ہیں، ان کے خلاف بیان مناسب نہیں، پی ٹی آئی کی قیادت کو شہباز گل کے بیان سے الگ ہونا چاہیے۔

وزیر اعلیٰ پنجاب چوہدری پرویز الہٰی نے ایک انٹرویو میں کہا ہے کہ آئی جی اور چیف سیکریٹری شہباز شریف نے لگائے تھے۔ میں نے آئی جی اور چیف سیکریٹری کو اوون کیا اور انہیں دل سے لگایا۔ انتقام لینے کے خلاف ہوں، اس پر اپنا وقت ضائع نہیں کرنا چاہتا ہوں۔

انہوں نے مزید کہا کہ لوگوں نے میری کارکردگی کا پوچھنا ہے، انتقام پر وقت کا ضیاع ٹھیک نہیں سمجھتا۔ وزیراعظم سیلاب متاثرہ علاقوں میں گئے، میں نے ہی پہلے وہاں آئی جی اور چیف سیکریٹری کو بھیجا۔ چیف سیکریٹری سے کہا وزیراعظم جو اعلان کریں اس پر ہم نے بھی عمل کرنا ہے۔

یہ بھی پڑھیں : چوہدری پرویز الہٰی کی نالہ لئی ایکسپریس وے پراجیکٹ جلد مکمل کرنے کی ہدایت

ان کا کہنا تھا کہ عمران خان کو ہم نے سیکیورٹی دینی ہے کیوں نہیں دیں گے۔ وزیر داخلہ پنجاب کے ساتھ جو سیکیورٹی تھی، وہ ساتھ گئی، ہم نے قانونی کام کیا۔ عمران خان کا بیان ہے کہ جو فوج کے خلاف ہو۔ وہ پاکستانی نہیں۔

وزیر اعلیٰ پنجاب نے کہا کہ میں نے شہباز گِل کے بیان کے خلاف بیان دیا۔ پی ٹی آئی کی قیادت کو شہبازگل کے بیان سے الگ ہونا چاہیے۔ ادارے ہمارے ہیں، ان کے خلاف بیان مناسب نہیں۔ شہباز گل کے بیان سے فائدہ نہیں نقصان ہوا۔

چوہدری پرویز الہٰی نے کہا کہ وزیر داخلہ رانا ثناءاللہ کا کوئی ذمہ دار بیان دکھادیں تو میں مان لوں۔ سیاسی مخالفت چلتی رہتی رہے گی، ملک اور صوبے کے مفاد پر کوئی تناو نظر نہیں آئے گا۔ طلال چوہدری نے عدالت کے خلاف بات کی سزا ہوئی اور نااہل ہو کر بیٹھ گئے۔ پرویز مشرف کے دور میں بھی اپنے کسی محکمے میں مداخلت نہیں ہونے دی۔