موٹر سائیکل سوار کی پولیس پر فائرنگ، 2 خواتین زخمی، ایک ملزم گرفتار

کراچی : موٹر سائیکل سوار نے ناکے پر روکنے پر پولیس پر فائرنگ کردی، 2 خواتین زخمی، ایک ملزم گرفتار ہوگیا۔

ایس پی گلشن اقبال شاہنواز چاچڑ کے مطابق گلستان جوہر میں پولیس اور ڈکیتوں کے درمیان فائرنگ کے تبادلے میں 2 خواتین زخمی ہوگئیں۔ پولیس نے موٹرسائیکل سوار ملزمان کوروکا تو انہوں نے فائرنگ کردی۔

پولیس مقابلے میں ایک ڈاکو زخمی ہوا، تاہم وہ اپنے ساتھی کی مدد سے فرار ہوگیا۔ پولیس زخمی ڈاکو اور اس کے ساتھی کے تعاقب میں تھی۔ ایک ملزم زخمی حالت میں جناح اسپتال پہنچا، جسے شناخت کے بعد گرفتار کرلیا۔

گرفتار ملزم کی کمر میں گولی لگی ہوئی ہے، ملزم سے دیگر ساتھیوں سے متعلق تفتیش جاری ہے۔