نا معلوم افراد کی فائرنگ سے جج شدید زخمی

ہری پور کے علاقے چوہڑ شریف میں مسلح حملہ آوروں کی فائرنگ سے ایڈیشنل سیشن جج محمد فرید شدید زخمی ہوگئے۔

جج پر مسجد میں داخل ہوتے وقت فائرنگ کی گئی جس میں شدید زخمی ہوئے اور بعد ازاں انہیں طبی امداد فراہم کرنے کے لیے فوری طور پر قریبی اسپتال منتقل کردیا گیا۔

پولیس رپورٹس کے مطابق یہ واقعہ اس وقت پیش آیا جب جج فرید نماز کی ادائیگی کے لیے جارہے تھے۔

پولیس نے حملے کی فوری تحقیقات شروع کردی ہیں اور ملوث ملزمان کے خلاف مقدمہ درج کرلیا ہے۔

ہری پور کے ضلعی پولیس افسر نے تصدیق کی کہ کیس میں نامزد چار مشتبہ افراد میں سے تین کو گرفتار کر لیا گیا ہے۔

گرفتار ملزمان کی شناخت غیور، جہانگیر اور شہباز کے نام سے ہوئی جب کہ پولیس چوتھے مشتبہ شخص کی گرفتاری کے لیے چھاپے مار رہی ہے۔