اسرائیل کا غزہ کے جبالیہ پناہ گزین کیمپ میں روٹی خریداروں پر حملہ

اسرائیلی فوج نے غزہ کے جبالیہ پناہ گزین کیمپ پر حملہ کیا جس میں روٹی خریدنے کی قطار میں کھڑے 8 فلسطینی شہید ہو گئے۔

الجزیرہ نے بتایا کہ اسرائیلی فوج نے پیر کی شام شمالی غزہ کی پٹی میں جبالیہ پناہ گزین کیمپ میں بے گھر فلسطینی پناہ گاہ کے سامنے روٹی خریدنے والے لوگوں کے ایک اجتماع پر فضائی حملہ کیا جس کے نتیجے میں 8 افراد شہید اور متعدد زخمی ہوگئے۔

فلسطینی شہری دفاع کے ترجمان محمود باسل نے ایک بیان میں کہا کہ جبالیہ میں الفخرہ اسکول کے سامنے لوگوں کے ایک اجتماع پر اسرائیلی فضائی حملے میں 8 شہید اور دیگر زخمی ہو گئے

مزید پڑھیں:اسرائیل کا فلسطینیوں کو پناہ دینے والے اسکول پر حملہ، 11 افراد شہید

فیلڈ ذرائع نے انادولو کو بتایا کہ اسرائیلی فضائی حملے میں شیلٹر اسکول کے قریب جبالیہ میں روٹی بیچنے والے مقام کو نشانہ بنایا گیا۔

الجزیرہ کے مطابق اسرائیلی وزیر اعظم نیتن یاہو نے کہا ہے کہ وہ دباؤ کے آگے نہیں جھکیں گے کیونکہ ہزاروں اسرائیلی جنگ بندی معاہدے اور غزہ میں قید قیدیوں کی رہائی کا مطالبہ کرتے ہوئے ان کی حکومت کے خلاف مظاہرہ کر رہے ہیں۔

حماس کے مسلح ونگ کا کہنا ہے کہ نیتن یاہو کی جانب سے معاہدے کے بجائے غزہ میں اسرائیلی فوجی چھاپوں پر انحصار کرنے کا مطلب ہے کہ مزید قیدیوں کو تابوت میں ان کے اہل خانہ کے حوالے کیا جائے گا۔

غزہ پر اسرائیل کی جنگ میں اب تک 40 ہزار 786 افراد شہید اور 94 ہزار 224 زخمی ہو چکے ہیں۔ 7 اکتوبر کو حماس کی زیر قیادت حملوں کے دوران اسرائیل میں ایک اندازے کے مطابق 1،139 افراد ہلاک ہوئے تھے۔