مراکش میں پانچ سالہ بچہ کنویں میں گر گیا، بچانے کی کوششیں جاری، پوری قوم فکرمند

رباط : مراکش میں پانچ سالہ بچہ کے کنویں میں گرنے سے پوری قوم پریشان ہے، جبکہ امدادی کارکنان بچے کو بچانے کے لیئے سرتوڑ کوششیں کررہے ہیں۔

مراکش میں شیف چاؤن شہر کے قریب پانی کے قریب کھیلنے والا پانچ سالہ بچہ کنویں کے اندر گر گیا، جس کو بچانے کے لیئے تمام ضروری مشینری لگادی گئی ہے اور اسے باہر نکالنے کے لیئے رات بھر کوششیں جاری رہیں۔

کنویں میں اتارے گئے کیمرے کی فوٹیج سے پتہ چلتا ہے کہ لڑکا زندہ اور ہوش میں ہے، حالانکہ اسے سر میں معمولی چوٹیں لگ رہی تھیں۔

یہ بھی پڑھیں : الجزائر نے مراکش کے لیئے اپنی فضائی حدود بند کردی

امدادی کارکنوں نے آکسیجن ماسک، خوراک اور پانی کو کنویں میں اتار دیا ہے اور ایک طبی ٹیم بھی جائے وقوع پر موجود ہے، جو لڑکے کے علاج کے لیے تیار ہے۔ کنویں سے نکالنے کے بعد اسے اسپتال لانے کے لیے ایک ہیلی کاپٹر بھی جائے وقوعہ پر پہنچ گیا ہے۔

سوشل میڈیا پر ہزاروں افراد ریسکیو کی فوٹیج دیکھ رہے ہیں اور عوام کی بڑی تعداد جائے وقوعہ پر جمع ہے۔

پانچ بلڈوزر کنویں کے بیرونی شافٹ کے متوازی ایک بڑے علاقے کو کھودتے ہوئے تنگ ڈھانچے کے ارد گرد کام کرنے کی کوشش کر رہے ہیں۔ تقریباً 24 میٹر کھود لیا گیا ہے، لیکن بچے تک پہنچنے کے لیے تقریباً چھ میٹر ابھی باقی ہیں۔ اب یہی واحد راستہ ہے، جس سے امدادی کارکن ریان تک پہنچ سکیں گے۔