مونگ پھلی کھانے کے صحت پر کیا کیا اثرات پڑتے ہیں ؟

مونگ پھلی کو بیشتر لوگ سرد موسم میں رات کے وقت کھانا زیادہ پسند کرتے ہیں، اس کے کھانے سے آپ کو صحت کے حیرت انگیز فوائد بھی ملتےہیں۔

مونگ پھلی کئی غذائی اجزاء سے لدی ہوتی ہے، مٹھی بھر مونگ پھلی کا استعمال آپ کو ایک ساتھ کئی غذائی اجزاء دیتا ہے لہٰذا ماہرین کہتے ہیں کہ اچھے ذائقے سے لطف اندوز ہونے اور حیرت انگیز فوائد حاصل کرنے کے لیے مونگ پھلی کو لازمی اپنی خوراک میں شامل کریں۔

بیشتر افراد کا ماننا ہے کہ مونگ پھلی بادام، اخروٹ یا کاجو جتنی مفید نہیں ہوتی،مگر حقیقت تو یہ ہے کہ مہنگی گریوں کے مقابلے میں سستی مونگ پھلی صحت کے لیے بہت مفید ثابت ہوسکتی ہے۔

امراض قلب میں مفید

تحقیق سے ثابت ہوا ہے کہ مونگ پھلی کھانے سے دل کی کسی بھی بیماری میں مبتلا ہونے کے امکانات کم ہوجاتے ہیں کیونکہ مونگ پھلی میں ایسے غذائی اجزاء ہوتے ہیں جو صحت مند دل کے لیے ضروری ہیں۔

وزن کم کرنے میں مفید

وزن کم کرنے کے خواہاں افراد کے لیے مونگ پھلی ایک بہترین غذا ہے کیونکہ مونگ پھلی پروٹین اور فائبر سے بھرپور ہوتی ہے، جو اسے تیل سے بنے ہوئے کھانوں کا صحت مند متبادل بناتی ہے۔

اس طرح مونگ پھلی کا باقاعدگی سے استعمال آپ کو پیٹ بھرنے اور بھوک کو کم کرنے میں مدد کرتا ہے جس کی وجہ سے آپ کا وزن کم ہوسکتا ہے۔

دماغ کو تیز کرنے میں مفید

صحت مند اور تیز دماغ کے لیے آپ کو وٹامن بی 1جیسے غذائی اجزاء کی ضرورت ہوتی ہے۔

ماہرین کے مطابق جب آپ مونگ پھلی کھاتے ہیں تو آپ کا جسم ان غذائی اجزاء سے بھر جاتا ہے جس کی وجہ سے آپ کا دماغ تیز ہو جاتا ہے۔

ہڈیاں مضبوط کرنے میں مفید

بڑھاپا ہمارے جسم میں موجود کئی ہڈیوں کو کمزور کرنے کا سبب بنتا ہے لہذا اس سے پہلے کہ آپ کی ہڈیاں اپنی طاقت کھونے لگیں، آپ کو صحت مند غذا جیسے مونگ پھلی کھانے پر توجہ دینی چاہیے۔

ماہرین کے مطابق مونگ پھلی فاسفورس سے بھرپور ہوتی ہے جبکہ اس میں موجود غذائی اجزاء اور دیگر وٹامنز آپ کی ہڈیوں کی مضبوطی کو برقرار رکھنے میں مدد کرتے ہیں۔

اچھی جلدکے لیے مفید

مونگ پھلی بہتر اور چمکدار جلد کو یقینی بنانے میں مدد کرتی ہے کیونکہ اس میں وٹامن بی 3 اور اینٹی آکسیڈینٹ اولیک ایسڈ جیسے غذائی اجزاء نہ صرف چہرے کی جھریوں کو روکنے میں مدد دیتے ہیں بلکہ جلد کی مختلف بیماریوں سے بھی بچاتے ہیں۔

نظر کی بہتری میں مفید

جب آنکھوں کی صحت کو برقرار رکھنے کی بات آتی ہے تو، سبزیاں اور مونگ پھلی بہترین غذا ہیں جن کا استعمال کیا جا سکتا ہے۔

مونگ پھلی میں موجود زنک جسم کو وٹامن اے کو ٹرانسفر کرنے میں مدد کرتا ہے جو صاف بینائی کے لیے ضروری ہے۔

کینسر کے خطرے کو کم کرنے میں مفید

تحقیق سے ثابت ہوا ہے کہ مونگ پھلی کھانے سے کینسر کا خطرہ کم ہوجاتا ہے کیونکہ مونگ پھلی میں موجود پروٹین اور وٹامن ای انسانی جسم کو کینسر جیسے مرض سے محفوظ رکھتے ہیں۔

ذیابیطس سے محفوظ کرنے میں مفید

چونکہ مونگ پھلی میں شوگر کی مقدار نہیں ہوتی اس لیے یہ ذیابیطس کے مریضوں کے لیے مکمل طور پر محفوظ ہیں۔

نوٹ: یہ مضمون عام معلومات کے لیے ہے،آپ قارئین اس حوالے سے اپنے معالج سے بھی ضرور مشورہ لیں۔

یہ پڑھیں : سردیوں میں قوتِ مدافعت بڑھانے کے آسان طریقے