موٹرسائیکل پر دنیا گھومنے والی غیر ملکی خاتون بھارت میں اجتماعی زیادتی کا شکار

نئی دہلی: بھارت میں موٹر سائیکل پر ورلڈ ٹور کرنے والی ہسپانوی خاتون کو شوہر کے سامنے اجتماعی زیادتی کا نشانہ بنادیا گیا۔

بھارتی میڈیا کے مطابق یہ واقعہ جمعہ کی رات بھارتی ریاست جھارکھنڈ کے ضلع ڈمکا میں پیش آیا جہاں یہ جوڑا ایک خیمے میں رات گزارنے کے لیے رکا تھا۔

ملزمان نے خاتون سے اجتماعی زیادتی کی اور اسکے شوہر کو زدوکوب کیا، بعدازاں انکا سامان اور رقم لے کر فرار ہوگئے۔

مقامی میڈیا کو پولیس نے بتایا کہ متاثرہ خاتون اپنے شوہر کے ہمراہ رات 11 بجے کے قریب گشت پر مامور پولیس وین تک پہنچنے میں کامیاب ہوئی جسے علاج کے لیے مقامی اسپتال منتقل کردیا گیا۔

پولیس کا کہنا ہے کہ متاثرہ خاتون اور اس کے شوہر نے کرماہاٹ کے قریب ایک جنگلاتی علاقے میں کیمپ لگایا تھا، واقعے کی اطلاع ملتے ہی فوری کارروائی کی گئی۔

پولیس کے مطابق انہوں نے گینگ ریپ کے الزام میں تین افراد کو حراست میں لے لیا ہے اور مزید مشتبہ افراد کی تلاش جاری ہے جنہیں جلد گرفتار کرلیا جائے گا۔

یہ پڑھیں : گوگل نے رشتہ تلاش کرنے والی بھارتی ایپس کو پلے اسٹور سے ہٹا دیا