پاکستان کی نئی مردم شماری کے حیران کُن نتائج سامنے آگئے

پاکستان کے ساتویں اور افتتاحی ڈیجیٹل مردم شماری کے جامع نتائج سامنے آگئے ہیں۔

نئی مردم شماری کے نتائج کے مطابق پاکستان اب دنیا کا پانچواں سب سے زیادہ آبادی والا ملک ہے، جہاں 241.49 ملین افراد رہتے ہیں۔

آبادی میں اضافے کی شرح

پاکستان میں سالانہ آبادی میں اضافے کی شرح 2.55 فیصد ہے جو اسے خطے میں سب سے تیزی سے ترقی کرنے والے ممالک میں سے ایک قرار دیتی ہے اور آبادی میں اضافے کے لحاظ سے اسے عالمی سطح پر سرفہرست 30 ممالک میں شامل کرتی ہے۔

دنیا بھر میں صرف 27 ممالک میں آبادی میں اضافے کی شرح پاکستان سے زیادہ ہے، اگر موجودہ رجحان برقرار رہا تو 2050 تک پاکستان کی آبادی دگنی ہونے کا امکان ہے۔

نوجوانوں کی آبادیاتی پروفائل

پاکستان کی 79 فیصد آبادی 40 سال سے کم عمر ہے جس کی وجہ سے پاکستان دنیا بھر میں نوجوانوں کی آبادی کے لحاظ سے سب سے بڑا ملک ہے۔

عالمی آبادی کی درجہ بندی میں پاکستان اس وقت 191 ویں نمبر پر ہے۔

علاقائی آبادی میں اضافے کی شرح

بلوچستان میں آبادی میں سالانہ اضافے کی شرح سب سے زیادہ 3.2 فیصد ہے جب کہ سندھ میں 2.57 فیصد، پنجاب میں 2.53 فیصد اور خیبر پختونخوا میں آبادی میں اضافے کی شرح 2.38 فیصد ہے۔

مذہب کے لحاظ سے تقسیم

پاکستان کی 35 فیصد آبادی مسلمان ہے جب کہ اقلیتی آبادی 8.7 ملین افراد پر مشتمل ہے، جو مجموعی آبادی کا 3.65 فیصد بنتا ہے۔

اقلیتی آبادی میں 44 فیصد ہندو اور 37.63 فیصد عیسائی شہری شامل ہیں۔

خواندگی کی شرح

• 10 سال اور اس سے زیادہ عمر کے 104.1 ملین سے زیادہ افراد خواندہ ہیں۔

• اسلام آباد 84 فیصد شرح خواندگی کے ساتھ ملک میں سرفہرست ہے۔

• پنجاب 66 فیصد شرح خواندگی کے ساتھ دوسرے نمبر پر ہے۔

• سندھ میں شرح خواندگی 58 فیصد ہے۔

• بلوچستان میں شرح خواندگی 51 فیصد ریکارڈ کی گئی ہے۔

کھانا پکانے اور روشنی کے لئے توانائی کے ذرائع

رپورٹ میں بتایا گیا ہے کہ پاکستان کی 52.72 فیصد آبادی کھانا پکانے کے لیے لکڑی پر انحصار کرتی ہے۔

یہ بھی پڑھیں: ذیابیطس کا عالمی دن ،ملک کی ایک تہائی آبادی ذیابیطس کا شکار

42 فیصد سے زیادہ لوگ گیس استعمال کرتے ہیں جبکہ دیگر مٹی کا تیل، بجلی، بائیو گیس اور گوبر استعمال کرتے ہیں۔

نئی مردم شماری کے نتائج سے معلوم ہوتا ہے کہ روشنی کے لئے 84 فیصد آبادی بجلی،  7.74 فیصد سولر پینل اور 1.23 فیصد مٹی کا تیل استعمال کرتے ہیں۔اس کے علاوہ باقی آبادی گیس لیمپ، جنریٹر اور دیگر ذرائع پر منحصر ہے۔