’اگر اسرائیلی دشمن جنگ کا فیصلہ کرتا ہے تو ہم اس کیلئے تیار ہیں‘

لبنانی تنظیم حزب اللہ نے کہا ہے کہ وہ جنگ نہیں چاہتی لیکن اگر اسرائیلی دشمن جنگ کا فیصلہ کرتا ہے تو وہ اس کے لیے تیار ہے۔

لبنان کی حزب اللہ کے ایک اعلیٰ عہدیدار نے عربی زبان کے معروف ٹیلی ویژن چینل المنار کو دیے گئے ایک انٹرویو میں کہا کہ ہم نے جنوب میں جو کچھ کیا وہ غزہ کی حمایت، لبنان کی حفاظت اور اسرائیل کو روکنے کے لیے پیشگی دفاع تھا۔

حزب اللہ کے ڈپٹی سیکرٹری جنرل شیخ نعیم قاسم نے تنظیم کی عظیم دفاعی صلاحیتوں پر روشنی ڈالی اور اسرائیلی حکومت کو متنبہ کیا کہ وہ قابض ادارے کو نقصان پہنچانے کے لئے اپنی طاقت کو کم سے کم نہ سمجھے۔

مزید پڑھیں:

فلسطین کے حق میں طلبا کاگرمی کی چھٹیوں میں بھی احتجاج جاری رکھنے کا اعلان

نعیم قاسم نے کہا کہ لبنان کی مزاحمتی تحریک کا ملک کے جنوب میں حکومت کے ساتھ ٹکراؤ حزب اللہ کی طاقت کا صرف ایک حصہ ہے۔

ان کا کہنا تھا کہ "حزب اللہ کی اسرائیل کو نقصان پہنچانے کی صلاحیت کو نظر انداز نہ کریں، جنوبی محاذ پر جو مزاحمت استعمال کی گئی وہ اس کے ہتھیاروں کی طاقت کا حصہ ہے اور جو پوشیدہ ہے وہ اس سے کہیں زیادہ ہے۔

انہوں نے متنبہ کیا کہ دشمن کو سمجھنا چاہیے کہ اگر وہ ہمیں زیادہ تکلیف پہنچائے گا تو اسے زیادہ تکلیف اٹھانی پڑے گی۔

حزب اللہ کے سینئر عہدیدار نے کہا کہ غزہ کے لیے لبنان کی کسی بھی قسم کی حمایت لبنان کے مفاد میں بھی ہے۔ انہوں نے کہا کہ غزہ کے لئے لبنان کی حمایت دو مقاصد پر عمل پیرا ہے – پہلا فلسطین کی حمایت کرنا اور دوسرا دشمن کو روکنا ہے۔