وزیراعظم کا جی ایچ کیو کا الوداعی دورہ، شہداء کی یادگار پر حاضری

راولپنڈی: وزیراعظم شہباز شریف نے جنرل ہیڈ کوارٹرز (جی ایچ کیو) کا الوداعی دورہ کیا۔

آئی ایس پی آر کے مطابق وزیراعظم شہباز شریف کی جی ایچ کیو آمد پر آرمی چیف جنرل عاصم منیر نے وزیراعظم کا استقبال کیا۔

آئی ایس پی آر کا کہنا ہے کہ جی ایچ کیو کے دورے پر وزیراعظم کو گارڈ آف آنر پیش کیا گیا اور انہوں نے یادگار شہدا پر پھول بھی رکھے۔

آئی ایس پی آر نے بتایا کہ دورے میں وزیراعظم نے پرنسپل اسٹاف آفیسرز سے ملاقات کی۔

یہ بھی پڑھیں: پاکستان ایک جوہری طاقت ہے، دشمن ہمیں میلی آنکھ سے نہیں دیکھ سکتا: وزیراعظم

وزیراعظم نے شہدا، غازیوں اور ان کے خاندانوں کو وطن کے دفاع کے لیے قربانیوں اور خدمات پر خراج تحسین پیش کیا۔

شہباز شریف کا کہنا تھا کہ شہدا اور غازی ہمارا فخر ہیں، ہمیں اپنے شہدا اور غازیوں کی عظیم قربانیوں کا احترام کرنا چاہیئے، شہدا کی یادگاروں کی بے حرمتی کرنے والوں کو معاف نہیں کیا جائے گا، ان شرپسندوں کے سیاہ کارناموں کو تاریخ نہیں بھولے گی۔

آئی ایس پی آر کے مطابق وزیر اعظم نے شہدا کے اہلخانہ اور غازیوں میں چیک تقسیم کیے، وزیر اعظم نے شہدا کے بچوں میں لیپ ٹاپس بھی تقسیم کیے۔