جو ملک کیخلاف کام کرے گا انہیں نہیں چھوڑیں گے: وزیراعلیٰ سندھ

کراچی: مراد علی شاہ کا کہنا ہے کہ جو ملک کیخلاف کام کرے گا انہیں چھوڑیں گے نہیں، ہم کراچی میں امن بحال کرنے کے لیے ہر حد تک جائیں گے۔

وزیراعلیٰ سندھ مراد علی شاہ کا سندھ اسمبلی میں اظہار خیال کرتے ہوئے کہنا تھا کہ پیپلزپارٹی کا مؤقف رہا ہے نیب کو ختم کیا جائے، یہ حضرت کہتے تھے کہ مک مکا ہے، یہ وہی نیب ہے جس کیخلاف اس ہاؤس میں قرارداد پاس کی گئی، نیب ترمیم کا پہلا بینیفشری عمران خان نیازی ہے، ہم چاہتے تھے نیب قانون ختم کریں انہوں نے کہا این آر او مانگ رہے ہیں۔

مراد علی شاہ کا کہنا تھا کہ پہلے 90 دن کا ریمانڈ ہوتا تھا ہم نے ختم کر کے 14 روز کیا، ہماری واضح ہدایات تھیں کہ پر امن احتجاج کرنا چاہیں تو پوری اجازت ہے، ہم نے کہا تھا کہ قانون کو ہاتھ میں لینے نہیں دیں گے، شارع فیصل پر جب نکلے تھے تو آدھے گھنٹے میں منتشر ہوئے تھے، قائد اعظم محمد علی جناح کا گھر جلانے کے بعد ان کو مزید جوش آیا، انہوں نے سوچا کہ کراچی میں بھی یہ حرکتیں کریں گے۔

یہ بھی پڑھیں: مبینہ بیٹی کیس، عمران خان نا اہلی کیس ناقابل سماعت قرار

انہوں نے کہا کہ پیپلز بس کو نقصان پہنچانے والوں کو نہیں چھوڑیں گے، جو ملک کیخلاف کام کرے گا انہیں چھوڑیں گے نہیں، جو پر امن احتجاج کرنا چاہتا ہے انتظامیہ سے اجازت لے ہم دینگے، ویڈیو میسجز بھیج کر احتجاج کرینگے اور سڑک پر نکلے تو دھرلیا جائے گا، ہم کراچی میں امن بحال کرنے کے لیے ہر حد تک جائیں گے۔