روس یوکرین بحران : جوہری پلانٹ پر کوئی بھی حملہ خودکشی ہے : اقوام متحدہ

ٹوکیو : اقوام متحدہ کے سیکریٹری جنرل نے خبردار کیا ہے کہ یوکرین کے جوہری پلانٹ پر کوئی بھی حملہ خودکشی ہے۔

ماسکو اور کیف یوکرین میں یورپ کے سب سے بڑے ایٹمی پاور کمپلیکس میں تازہ ترین حملوں کی ذمہ داری ایک دوسرے پر عائد کر رہے ہیں، جو جنگ کے ابتدائی دنوں سے روسی قبضے میں ہے۔ اس صورتحال پر دنیا کے کئی ممالک خاص طور پر یورپی ممالک کو تشویش ہے۔

اقوام متحدہ کے سیکریٹری جنرل انتونیو گوتیرس نے جاپان کے دارالحکومت ٹوکیو میں پریس کانفرنس کے دوران ان حملوں کی مذمت کی اور کہا کہ ہم اس پلانٹ کے استحکام کے حالات پیدا کرنے کے سلسلے میں آئی اے ای اے کی کوششوں کی حمایت کرتے ہیں۔

یہ بھی پڑھیں : روسی گیس کی سپلائی میں کمی کا خدشہ، یورپ کے ممالک توانائی کی بچت کرنے لگے

انہوں نے کہا کہ جوہری پلانٹ پر کوئی بھی حملہ خودکشی ہے۔ مجھے امید ہے کہ وہ حملے ختم ہو جائیں گے، اور ساتھ ہی مجھے امید ہے کہ آئی اے ای اے پلانٹ تک رسائی حاصل کر سکے گی۔

ان کے تبصرے ہفتے کے آخر میں ہیروشیما کے دورے کے بعد آئے، جہاں گوتیرس نے دنیا کے پہلے جوہری بم حملے کی 77 ویں برسی کے موقع پر ایک تقریر کی۔