بائیڈن، پیوٹن سے ملاقات کیلئے تیار، یوکرین پر حملہ نہ کرنے کی شرط

واشنگٹن : وائٹ ہاؤس کا کہنا ہے کہ بائیڈن نے اصولی طور پر پیوٹن سے ملاقات پر اتفاق کیا ہے، لیکن اس کی شرط رکھی ہے کہ روس یوکرین پر حملہ نہیں کرے گا۔

امریکہ کے صدر جو بائیڈن نے روسی صدر ولادیمیر پیوٹن کے ساتھ فرانسیسی ثالثی میں ہونے والے سربراہی اجلاس کے لیے اصولی مؤقف اپنایا ہے کہ اگر روس، یوکرین پر حملہ نہیں کرتا تو وہ روسی صدر سے ملاقات کے لیئے تیار ہیں۔

وائٹ ہاؤس کی پریس سیکرٹری جین ساکی نے صحافیوں کو بتایا کہ ہم سفارت کاری کے لیے ہمیشہ تیار ہیں۔ اگر روس جنگ کا انتخاب کرتا ہے تو ہم فوری اور سنگین نتائج مسلط کرنے کے لیے بھی تیار ہیں۔ اور فی الحال، ایسا لگتا ہے کہ روس بہت جلد یوکرین پر مکمل حملے کی تیاری جاری رکھے گا۔

یہ بھی پڑھیں : پیوٹن نے یوکرین پر حملہ کرنے کا فیصلہ کرلیا : جو بائیڈن

فرانسیسی ایوان صدر نے بھی ملاقات کی تصدیق کی ہے۔ تاہم، اس سربراہی اجلاس کے بارے میں مزید تفصیلات نامعلوم ہیں، جس کا منصوبہ فرانسیسی صدر ایمانوئل میکرون، بائیڈن، پیوٹن، یوکرین کے صدر ولادیمیر زیلینسکی اور برطانوی وزیر اعظم بورس جانسن کے درمیان کئی فون کالز کے بعد کیا گیا تھا۔

امریکی وزیر خارجہ انٹونی بلنکن اور روس کے وزیر خارجہ سرگئی لاوروف اس ہفتے کے آخر میں جمعرات (24 فروری) کو ملاقات کرنے والے ہیں۔ بائیڈن-پیوٹن ملاقات کا مادہ وزرائے خارجہ کے اجلاس میں طے کیا جائے گا۔