سردی کا موسم بڑا ہی خوبصورت موسم ہے اس موسم کے جذبات ہی بڑے کوئی مختلف ہوتے ہیں ۔ جیسے بارش کے جذبات یعنی اگر بارش میں کوئی خوشی کا وقت ہوتو بارش کی چھن چھن موسیقی محسوس ہوتی ہے اور اگر بارش کے وقت کوئی غم سے دل بھاری ہو تو بارش کی چھن چھن سر میں ہتھوڑی کی طرح محسوس ہوگی۔اسی طرح سردی کاموسم خوشیوں کو دوبالا کردےگا اور غموں کو بھی بھڑکادیتا ہے۔یہ مختصرتعارف ہے سردی کا ورنہ تو باتیں بہت۔

ہر موسم کے خاص رنگ ہوتے ہیں ، ڈھنگ ہوتے ہیں اور پھر اس موسم کو برتنے کا انداز ہوتا ہے۔ ہر موسم کچھ ساتھ لاتا ہے اور واپسی پلٹتے ہوئے کچھ ساتھ لے جاتا ہے، سردی کے موسم کی اپنی سوغات ہے لیکن ہر سوغات سب کے لئے نہیں ، ہر کوئی اپنی پسند اور جیب کے حساب سے ہی سردی کی سوغات کے لُطف اٹھا سکتا ہے۔ تو پھر جانئے کہ سردی کی سوغات کون سی ہے ؟

شکر قندی:

شکرقندی عام طور پر تو نظر نہیںآتی مگر سردی کا آغاز ہوتے ہی ٹھیلے پر شکر قندی بکتی نظر آجاتی ہے۔ میٹھی میٹھی شکر قندی کا ذائقہ کمال ہوتا ہے اور اوپر سے لیموں اور مصالحہ کا چٹخارہ اس کے ذائقہ کو چار چاند لگادیتا ہے۔ویسے تو یہ والی سوغات شا م میں چائے کےساتھ استعمال ہوتی ہے مگر بہت سے لوگ کسی بھی وقت منہ کے ذائقے تبدیل کرنے کے لئے اس کو کھاتے ہیں۔

سوپ:

سردی اور سوپ کا چولی دامن کا ساتھ ہے اس کی وجہ سوپ کا ذائقہ بھی ہوتا ہے اور کارگربھی۔ ذائقہ کے تو کیا ہی کہنے ،کارگر یوں کہ اس سے ٹھنڈ کو کم کیا جاسکتا ہے جسم میں گرماہٹ دوڑائی جاتی ہے۔یہاں سردی کی پہلی ہوا چلی وہاں سوپ کے اسٹال سج گئے اور پھرشام سے رات گئے تک سوپ پینے اور پارسل والوں کا تانتا بندھا رہتا ہے۔سوپ کے ساتھ ساتھ یخنی بھی پسند کی جاتی ہے۔

مونگ پھلی:

مونگ پھلی اور سردی کی راتیں کیا خوبصورت ساتھ ہے۔ سردیوں کا آفیشل قدرتی اعلان ٹھنڈی ہوا سے ہوتا ہے اور انسانی اعلان مونگ پھلی ریڑھی کی گھنٹی سے ہوتا ہے۔ سردی ہو ، کمبل ہو،مونگ پھلی ہو اور مووی ہو، اس سے کمال تفریح بھلا کیا ہوسکتی ہے۔ مونگ پھلی خشک میوہ جات کی چند اقساموں سے ایک ایسی قسم ہے جو ابھی تک غریبوں کی پہنچ میں ہے ورنہ خشک میوہ جات کا بہت بڑا حلقہ غریبوں سے روٹھ گیا ہے۔

کافی:

کافی ہر کوئی پسند نہیں کرتا مگر سردی کی راتیں طویل ہو تو کافی کا ساتھ ضروری ہوجاتا ہے۔کافی کا حلقہ احباب کا تعلق گہری فکر وتعلق والے لوگوں سے ہے۔بالخصوص کتاب پڑھنے والے شائقین یا پھر فنون لطیفہ سے جڑے لوگ اس سلسلہ کافی سے جڑے رہتے ہیں اور لطف اندوز ہوتے ہیں ۔ویسے تو کافی کے شائق پورا سال اس کو پیتے ہیں مگر سردی میںچائے والے بھی کافی سے دوستی کرلیتے ہیں جیسے کہ ہم۔

اس بارے میں پڑھیئے : طبقات میں بٹے موسم

قہوہ:

سردی کی راتیں ہوں، مونگ پھلی کا ٹھیلا ہو، شکر قندی والا بھی ہو اور ایک اور چیز بھی ہے جو ان سرد راتوں میں سڑکوں پر نظر آتے ہیں ۔ ہاں وہ ہیں تھرماس اٹھائیں چھوٹی بالٹی تھامیں قہوہ بیچنے والے محنت کش۔ قہوہ والا گلیو ں گلیوں جاکر قہوہ بیچتا ہے، سردی بھگانے اور سردی کو انجوائے کرنے کا ایک ذریعہ یہ قہوہ بھی ہے۔

گاجر کا حلوہ:

پورے سال کیک ، ربڑی ، مٹھائیاں کھانے والے سردی میں سب سے ناطہ توڑ لیتے ہیں اس کی وجہ گاجر کا حلوہ۔گاجر کا حلوہ بلا شبہ ایسی لازوال ڈش ہے جس کا زوال نہیں لوگ پورے سال اس کا انتظار کرتے ہیں جیسے آم کا کرتے ہیں۔گرم گرم گاجر کا حلوہ اور اوپر سے کھوئےکی سجاوٹ ، آپ کو سوچنے میں کتنا ذائقہ آرہا ہے تو سوچیئے جب سامنے ہوگا تو۔ گاجرکے حلوے کی وہی حیثیت ہے کھانوں میں بریانی کی ہے اورپھلوں میں آم کی ہے ۔

تحریر : مدثرمہدی