انتخابات 2018میں وزارت دفاع نے ڈھائی لاکھ فوجی اہلکار فراہم کرنے کا عندیہ دے دیا

اسلام آباد : الیکشن کمیشن نے انتخابات میں پاک فوج کی تعیناتی کی منظوری دیدی اور وزارت دفاع کو سمری بھجوادی ہیں۔

تفصیلات کے مطابق الیکشن کمیشن آف پاکستان نے عا م انتخابات 2018میں پاک فوج کو تعینات کرنے کی منظوری دیتے ہوئے وزارت دفاع کو فوج تعینات کرنے سے متعلق سمری بھجوا دی گئی۔

ذرائع الیکشن کمیشن کا کہنا ہے کہ فوج کی تعیناتی سے متعلق وزارت کیساتھ الیکشن کمیشن کے معاملات طے ہیں، ساڑھے 3لاکھ فوجی اہلکاروں کی ضرورت ہے، وزارت دفاع نے ڈھائی لاکھ فوجی اہلکار فراہم کرنے کا عندیہ دے دیا ہے۔

الیکشن کمیشن کے مطابق حتمی منظوری کے بعد جوانوں کی تعداد کا تعین کیا جائے گا، پولنگ اسٹیشنز کی تفصیلات وزارت دفاع کو دے دی گئی ہے، پولنگ سے ایک روز پہلے پولنگ اسٹیشنز کا کنٹرول فوج سنبھالے گی۔

ذرائع کا کہنا ہے کہ پرنٹنگ پریس کی نگرانی کا کنٹرول بھی فوج کو دینے کا فیصلہ کیا گیا ہے جبکہ بیلٹ پیپرز کی چھپائی، ترسیل فوج کی نگرانی میں ہوگی۔

گذشتہ روز چیف الیکشن کمشنر کی زیر صدارت الیکشن کمیشن کا اہم اجلاس ہوا۔ اجلاس میں متعلقہ افسران نے الیکشن سیکیورٹی انتظامات پر بریفنگ دی گئی تھی۔

اجلاس میں الیکشن کے لیے فول پروف سیکیورٹی انتظامات کا فیصلہ کیا گیا تھا اور کہا گیا تھا کہ الیکشن فوج کی نگرانی میں کرائے جائیں گے جبکہ رینجرز کی خدمات بھی حاصل کی جائیں گی