اوبر کا پاکستان بھر میں اپنی سروسز بند کرنے کا اعلان

معروف آن لائن کیب اوبر نے پاکستان میں اپنی ایپلی کیشن بند کرنے کا اعلان کردیا۔

ایک بیان میں ترجمان اوبر نے کہا کہ ہم نے پاکستان میں اپنی رائیڈ ہیلنگ ایپ کو بند کرنے کا فیصلہ کیا ہے۔

ترجمان نے بتایا کہ اوبر پاکستان میں بند ہونے کے باوجود ہمارا ماتحت برانڈ کریم ملک میں اہنی سروسز جاری اور ڈرائیورز کو مواقع فراہم کرتا رہے گا۔

یاد رہے کہ 2019 میں اوبر نے اپنے حریف کریم کو 3.1 ارب ڈالر میں خریدا تھا۔ دونوں کمپنیوں نے کہا تھا کہ وہ اپنی متعلقہ علاقائی خدمات اور آزاد برانڈز کو چلانا جاری رکھیں گے۔

اکتوبر 2022 میں اوبر نے کراچی، ملتان، فیصل آباد، پشاور اور اسلام آباد میں اپنا آپریشن بند کر دیا تھا۔ اس نے کریم کے ذریعے اور لاہور میں اوبر ایپ کے ذریعے پانچ شہروں میں کام کرنے کا فیصلہ کیا تھا۔

لاہور میں صارفین کو بھیجی گئی ایک ای میل میں اوبر کا کہنا تھا کہ اس نے یکم مئی سے لاہور میں اوبر ایپ سروسز پیش نہ کرنے کا مشکل فیصلہ کیا ہے۔

ای میل میں کہا گیا ہے کہ ہمارے ماتحت برانڈ کریم کے ذریعے رائیڈ ہیلنگ خدمات پیش کی جاتی رہیں گی اور آپ کے پاس سائن اپ کرنے اور کریم پر سفر کی درخواست کرنے کا آپشن ہوگا۔

اس کی روشنی میں کریم رائیڈز چیک ان کرنے اور سائن اپ کرنے کے لیے آپ سے رابطہ کر سکتی ہیں۔ اگر آپ نہیں چاہتے کہ آپ کی تفصیلات کریم کے ساتھ شیئر کی جائیں تو براہ کرم 3 مئی 2024 تک نیچے دیئے گئے فارم کو پر کریں۔

اس میں کہا گیا ہے کہ اگر آپ اس وقت اپنے اوبر والٹ میں اوبر کیش بیلنس رکھتے ہیں تو ہم آپ کے اوبر کیش بیلنس کو دوبارہ حاصل کرنے کے عمل کے بارے میں مناسب وقت پر آپ کے ساتھ بات چیت کریں گے۔