پاکستان کیساتھ اسٹاف لیول معاہدے کی جانب اہم پیشرفت ہوئی ہے، آئی ایم ایف

بین الاقوامی مالیاتی فنڈ (آئی ایم ایف) کی ویب سائٹ پر جاری بیان میں کہا گیا ہے کہ پاکستانی حکام اور مالیاتی ادارے کے درمیان نئے پروگرام پر اسٹاف لیول معاہدے (ایس ایل اے) تک پہنچنے کی جانب اہم پیش رفت کی ہے۔

آئی ایم ایف مشن نے 23 مئی کو اپنا دورہ پاکستان مکمل کیا، اس دوران مشن نے اسلام آباد میں پاکستانی معاشی ٹیم کے ساتھ ایک طویل، بڑی توسیعی فنڈ سہولت (ای ایف ایف) پر تبادلہ کیا۔

پاکستان میں آئی ایم ایف کے مشن چیف نیتھن پورٹر کے حوالے سے جاری بیان میں کہا گیا ہے کہ 2023 کے اسٹینڈ بائی ارینجمنٹ (ایس بی اے) کی کامیاب تکمیل کے ذریعے حاصل ہونے والے معاشی استحکام کی بنیاد پر آئی ایم ایف اور پاکستانی حکام نے ایک جامع معاشی پالیسی اور اصلاحاتی پروگرام پر اسٹاف لیول ایگریمنٹ (ایس ایل اے) تک پہنچنے کی جانب اہم پیش رفت کی ہے جسے توسیعی فنڈ سہولت (ای ایف ایف) کے تحت معاونت فراہم کی جاسکتی ہے۔

آئی ایم ایف کے اصلاحاتی پروگرام کا مقصد پاکستان کو معاشی استحکام سے مضبوط، جامع اور لچکدار ترقی کی طرف لے جانا ہے۔

بیان میں کہا گیا کہ اس مقصد کو حاصل کرنے کے لئے حکام منصفانہ ٹیکسوں کے ذریعے ملکی محصولات کو بہتر بنانے کے ساتھ ساتھ انسانی سرمائے، سماجی تحفظ کے لئے اخراجات میں اضافہ جب کہ عوامی مالیات کو مضبوط بنانے کا ارادہ رکھتے ہیں۔

اپنے بیان میں مالیاتی ادارے کا کہنا تھا کہ پاکستان کو توانائی کے شعبے میں اصلاحات، مناسب مانیٹری اور ایکسچینج ریٹ پالیسیوں کے ذریعہ کم اور مستحکم افراط زر کی طرف پیش رفت جاری رکھنا چاہئے جب کہ سرکاری ملکیت کے انٹرپرائز (ایس او ای) کی تنظیم نو اور نجکاری کے ذریعے عوامی خدمات کی فراہمی کو بہتر بنانے کی بھی ضرورت ہے۔

وفاقی حکومت اور آئی ایم ایف حکام آنے والے دنوں میں پالیسی پر بات چیت جاری رکھیں گے جس کا مقصد مالی امداد سمیت دیگر معاملات کو حتمی شکل دینا ہے۔

مشن اور حکام آنے والے دنوں میں پالیسی پر بات چیت جاری رکھیں گے جس کا مقصد بات چیت کو حتمی شکل دینا ہے، جس میں آئی ایم ایف اور پاکستان کے دو طرفہ اور کثیر الجہتی شراکت داروں کی جانب سے حکام کی اصلاحاتی کوششوں کو تقویت دینے کے لیے درکار مالی مدد بھی شامل ہے۔

واضح رہے کہ پاکستان نے 9 ماہ پر مشتمل آئی ایم ایف کا 3 ارب ارب ڈالر کا ایس بی اے پروگرام مکمل کیا تھا جس کے بعد وفاقی حکومت نے 6 سے 8 ارب ڈالر کے لیے ایک طویل المدتی پروگرام میں جانے کی خواہش ظاہر کی تھی۔

بہت سے تجزیہ کاروں کا خیال ہے کہ 7 جون کو حکومت کی جانب سے بجٹ پیش کیے جانے کے بعد آئی ایم ایف اور پاکستان اسٹاف لیول معاہدے پر پہنچ جائیں گے۔