پی ٹی آئی رہنماؤں سمیت سنی اتحاد کونسل کے سربراہ حامد رضا بھی گرفتار

اسلام آباد: گزشتہ رات پولیس نے پارلیمنٹ ہاؤس میں گھس کر سنی اتحاد کونسل کے صاحبزادہ حامد رضا سمیت پی ٹی آئی کے متعدد رہنماؤں کو گرفتار کرلیا۔

جی ٹی وی نیوز کے مطابق گزشتہ رات اسلام آباد پولیس نے وفاقی دارالحکومت میں عوامی اجتماع کے دوران قواعد کی خلاف ورزی پر قومی اسمبلی کے اجلاس کے بعد پی ٹی آئی کے رہنما شیر افضل مروت کو گرفتار کیا۔

اسلام آباد پولیس نے شیر افضل مروت کی گاڑی کا گھیراؤ کرتے ہوئے انہیں حراست میں لیا، تاہم پولیس کی جانب سے حراست میں لینے سے قبل شیر افضل مروت نے نعرے لگائے کہ ‘ہم عمران کے ساتھ کھڑے ہیں’۔

ذرائع کے مطابق قومی اسمبلی کے اندر کی لائٹس بند کردی گئیں جس کے بعد سویلین کپڑوں میں ملبوس چند افسران پارلیمنٹ ہاؤس میں داخل ہوئے جب کہ باہر موجود پولیس نے پوزیشن سنبھال لی۔

صاحبزادہ حامد رضا کو نقاب پوش اہلکاروں نے پارلیمنٹ کے اندر سے حراست میں لیا جبکہ پی ٹی آئی کے نسیم علی شاہ کو بھی گرفتار کیا گیا۔ پی ٹی آئی رہنما شیخ وقاص اکرم، عامر ڈوگر اور زین قریشی سمیت دیگر رہنماؤں کو بھی گرفتار کیا گیا ہے۔

وفاقی دارالحکومت میں ریڈ زون کو اچانک سیل کر دیا گیا اور عوام کو پیشگی اطلاع دیے بغیر تمام داخلی راستے بند کر دیے گئے۔ اس غیر متوقع اقدام کی وجہ سے
مارگلہ روڈ پر میلوں پر طویل ٹریفک جام ہوگیا۔

ذرائع کے مطابق شیر افضل مروت کو کل جلسے میں کی جانے والی قانونی خلاف ورزیوں کی وجہ سے گرفتار کیا گیا ہے۔

پولیس کے مطابق قانونی خلاف ورزیوں میں روٹ کی خلاف ورزی، کمٹمنٹ کی خلاف ورزی، اسلام آباد پولیس پر حملہ، اوقات کی خلاف ورزی اور ریاست مخالف تقاریر شامل ہیں۔