پاکستان میں پولیو کا پانچواں کیس بلوچستان سے رپورٹ

پاکستان میں پولیو کا ایک اور نیا کیس سامنے آیا ہے جس کے بعد 2024 میں ملک میں پولیو کیسز کی مجموعی تعداد 5 ہوگئی ہے۔

اے آر وائی نیوز نے ذرائع سے دعویٰ کیا ہے کہ پولیو کا پانچواں نیا کیس بلوچستان کے شہر کوئٹہ سے تعلق رکھنے والا دو سالہ بچے کا ہے جس کا وائلڈ پولیو وائرس ٹائپ ون (ڈبلیو پی وی ون) ٹیسٹ مثبت آیا ہے۔

اسلام آباد کے نیشنل انسٹی ٹیوٹ آف ہیلتھ نے رواں سال پاکستان میں پولیو کے پانچویں کیس کی تصدیق کی ہے۔

مزید پڑھیں:وزیراعظم کی بل گیٹس سے ملاقات، پاکستان کو پولیو سے پاک کرنےکا عزم

گزشتہ سال ملک میں پولیو کے 6 کیسز رپورٹ ہوئے تھے جن میں سے 4 کا تعلق خیبر پختونخوا اور 2 کا تعلق کراچی سے تھا۔

خیال رہے کہ یہ 2024 میں پولیو کا پانچواں کیس ہے، اس سے قبل پاکستان میں پولیو کے 4 کیسز رپورٹ ہوئے تھے۔ ایک کیس کا تعلق سندھ سے تھا جبکہ تین کیسز کا تعلق بلوچستان سے ہے۔

پولیو ایک انتہائی متعدی بیماری ہے جو فالج، معذوری اور یہاں تک کہ موت کا سبب بن سکتی ہے۔ پولیو کی روک تھام کیلئے ویکسینیشن سب سے موثر طریقہ ہے اور پاکستان اس بیماری کے پھیلاؤ کو روکنے کیلئے پانچ سال سے کم عمر کے لاکھوں بچوں کو پولیو کے قطرے پلانے کیلئے کام کر رہا ہے۔

عالمی ادارہ صحت (ڈبلیو ایچ او) پولیو کے حوالے سے پاکستان اور افغانستان کے ساتھ مل کر کام کر رہا ہے، دنیا کے صرف دو ممالک جہاں پولیو اب بھی موجود ہے، تاکہ ایک ہم آہنگ پولیو ویکسینیشن مہم کو نافذ کیا جا سکے۔