ٹی ٹوئنٹی ورلڈ کپ کیلئے 15 رکنی قومی اسکواڈ کا اعلان

پاکستان کرکٹ بورڈ (پی سی بی) نے ٹی ٹوینٹی ورلڈ کپ 2024 کے لیے 15 رکنی قومی ٹیم کا اعلان کردیا۔

پی سی بی کے مطابق ورلڈ کپ اسکواڈ میں بابر اعظم (کپتان)، صائم ایوب، محمد رضوان، فخر زمان، اعظم خان، عثمان خان اور افتخار احمد شامل ہیں۔

اس کے علاؤہ عماد وسیم، شاہین شاہ آفریدی، شاداب خان، محمد عامر، عباس آفریدی، نسیم شاہ، حارث رؤف اور ابرار احمد بھی ٹی ٹوئنٹی ورلڈ کپ میں قومی ٹیم کی نمائندگی کریں گے۔

واضح رہے کہ عثمان خان، اعظم خان، ابرار احمد، عباس آفریدی اور صائم ایوب پہلی بار ٹی ٹوئنٹی ورلڈ کپ کھیلیں گے۔

سلیکشن کمیٹی کا کہنا ہے کہ ٹیم متوازن ہے جس میں تجربہ کار اور نوجوان کرکٹرز دونوں شامل ہیں۔

کمیٹی نے کہا ہے کہ حارث رؤف فٹ ہیں، ٹی ٹوئنٹی ورلڈ کپ میں ان کا کردار بہت اہم ہوگا۔

پاکستان آئی سی سی ٹی ٹوئنٹی ورلڈ کپ کے گروپ اے میں شامل ہے۔

گروپ اے پاکستان سمیت بھارت، آئرلینڈ، کینیڈا اور امریکا پر مشتمل ہے۔

پاکستان اپنا پہلا میچ 6 جون کو میزبان امریکا کے خلاف کھیلے گا۔

جب کہ پاکستان اور بھارت کے درمیان میچ 9 جون کو نیویارک میں کھیلا جائے گا۔