مسافر نے تھوڑے روپوں کیلئے ڈرائیور کو بڑی سزا دیدی

پشاور: خیبرپختونخوا کے علاقے پاراچنار میں محض 20 روپوں کے خاطر مسافر نے وین ڈرائیور کا کان لیا۔

دی نیوز کی رپورٹ کے مطابق پاراچنار میں ایک عجیب وغریب واقعہ پیش آیا جہاں محض 20 روپے پر ہونے والے تنازع میں مسافر نے وین ڈرائیور کا کان کاٹ ڈالا، تاہم پولیس نے واقعے کے بعد ملزم وہاب علی کو گرفتار کر لیا ہے۔

ڈرائیور امجد علی نے پاراچنار تھانے میں شکایت درج کرائی کہ اس نے وہاب علی اور ایک خاتون مسافر کو شہر سے اٹھایا اور کالج کالونی میں اتارا، منزل پر پہنچ کر مسافر نے 100 روپے ادا کیے اور 20 روپے واپس کرنے کا مطالبہ کیا، جس پر ڈرائیور نے انکار کیا کہ کرایہ اتنا ہی بنتا ہے تو وہاب علی نے اس پر حملہ کر دیا اور اس کا کان کاٹ لیا۔

واقعے کے بعد زخمی ڈرائیور کو فوری طور پر ڈسٹرکٹ ہیڈ کوارٹر اسپتال پاراچنار پہنچایا گیا جہاں اسے طبی امداد فراہم کی گئی۔ بعد ازاں پولیس نے زخمی کی شکایت پر ملزم کو گرفتار کر لیا۔