ایم کیو ایم رہنما علی رضا عابدی قتل کیس کا فیصلہ سنادیا گیا

کراچی کی انسداد دہشتگردی عدالت نے متحدہ قومی موومنٹ پاکستان (ایم کیو ایم) رہنماء علی رضا عابدی قتل کیس کا فیصلہ سنا دیا ہے۔

اے ٹی سی نے علی رضا عابدی قتل کیس میں جرم ثابت ہونے پر 4 ملزمان کو عمر قید کی سزا سنادی اور ملزمان پر ایک، ایک لاکھ روپے جرمانہ بھی عائد کردیا۔

عدالت نے کیس کے مفرور ملزمان محمد فاروق، حسنین اور غلام مرتضی عرف کالی چرن کے خلاف کیس داخل دفتر کرتے ہوئے کہا کہ ملزمان جب بھی گرفتا ہوں عدالت کے سامنے پیش کیا جائے۔

ملزمان کے خلاف گذری تھانے میں دہشت گردی ایکٹ اور قتل کی دفعات کے تحت مقدمہ درج کیا گیا تھا۔

واضح رہے کہ 46 سالہ سابق رکنِ قومی اسمبلی علی رضا عابدی کو 25 دسمبر 2018ء کو کراچی کے علاقے ڈیفنس میں گھر کے باہر 2 موٹر سائیکلوں پر سوار گھات لگائے حملہ آوروں نے فائرنگ کر کے قتل کر دیا تھا۔