مقبول خبریں
دہشتگردوں کا بنوں چھاؤنی پر حملہ، 8 جوان شہید، جوابی کارروائی میں 10 دہشت گرد ہلاک
![دہشتگردوں کا بنوں چھاؤنی پر حملہ، 8 جوان شہید، جوابی کارروائی میں 10 دہشت گرد ہلاک](https://urdu.gtvnewshd.com/wp-content/uploads/2024/07/ispr-1.jpg)
راولپنڈی: دہشتگردوں کے ایک گروپ نے بنوں چھاؤنی پر خودکش دھماکے میں 8 فوجی جوان شہید کردیے۔
پاک فوج کے شعبہ تعلقات عامہ (آئی ایس پی آر) کے مطابق 15 جولائی کی صبح 10دہشتگردوں کے گروپ نے بنوں چھاؤنی پر حملہ کیا تاہم اس دوران سکیورٹی فورسز نے دہشتگردوں کی چھاؤنی میں داخل ہونےکی کوشش ناکام بنا دی جس پر دہشتگردوں نے بارود سے بھری گاڑی چھاؤنی کی دیوار سے ٹکرا دی۔
آئی ایس پی آر کا بتانا ہےکہ خودکش دھماکے کے نتیجے میں دیوار کا کچھ حصہ گرگیا اور اس سے ملحقہ انفرااسٹرکچر کو بھی نقصان پہنچا۔
آئی ایس پی آر کے مطابق دہشتگردوں کی جانب سے خودکش دھماکے میں 8 بہادر جوان شہید ہوگئے جب کہ کلیئرنس آپریشن میں سکیورٹی فورسز نے دہشتگردوں کا مقابلہ کیا اور فورسز کی بھرپور جوابی کارروائی میں تمام 10 دہشتگرد مارے گئے۔
آئی ایس پی آر کے مطابق شہید ہونے والوں میں نائب صوبیدار محمد شہزاد، حوالدار ظلِ حسین، حوالدار شہزاد احمد، سپاہی اشفاق حسین، سپاہی سبحان مجید، سپاہی امتیاز خان، سپاہی ارسلان اسلم اور ایف سی کے لانس نائیک سبز علی شامل ہیں۔
آئی ایس پی آر کے مطابق شہدا کا تعلق ضلع پونچھ آزاد کشمیر، خوشاب، ضلع نیلم آزاد کشمیر، ضلع مظفر آباد آزاد کشمیر، ضلع کرک، ضلع بہاولپور اور لکی مروت سے ہے۔
آئی ایس پی آر کے مطابق دہشتگردی کی یہ گھناؤنی کارروائی حافظ گل بہادر گروپ نے کی ہے جو افغانستان سے کام کرتا ہے، یہ گروپ ماضی میں بھی پاکستان میں دہشتگردی کی کارروائیوں کے لیے افغان سرزمین استعمال کرتا رہا ہے۔
آئی ایس پی آر کا کہنا ہےکہ افغانستان کی عبوری حکومت ایسے عناصر کے خلاف مؤثر کارروائی کرے، افغانستان سے آنے والے ان خطرات کے خلاف مناسب سمجھے جانے والے تمام ضروری اقدامات کریں گے جب کہ مسلح افواج دہشتگردی کی اس لعنت کے خلاف مادر وطن اور اس کی عوام کا دفاع کرتی رہیں گی۔
دوسری جانب ایک اور دہشتگردی کا واقعہ ڈیرہ اسماعیل خان کے رورل ہیلتھ سینٹر پر پیش آیا جہاں دہشتگردوں نے بزدلانہ حملہ جس کے نتیجے میں 5شہری شہید ہوگئے۔
آئی ایس پی آر کے مطابق دہشتگردوں نے رورل ہیلتھ سینٹر کے عملے پر فائرنگ کی جس کے نتیجے میں سیکیورٹی فورسز کے کلیئرنس آپریشن میں 3دہشتگرد ہلاک ہوگئے۔