شہباز وزیراعظم نہیں بس کرسی پر بیٹھے ہیں، فضل الرحمان کی آپریشن عزم استحکام کی مخالفت

سربراہ جمعیت علمائے اسلام ف (جے یو آئی) مولانا فضل الرحمان نے بھی آپریشن عزم استحکام کی مخالفت کردی۔

کوئٹہ میں پریس کانفرنس کرتے ہوئے مولانا فضل الرحمان نے کہا کہ عزم استحکام آپریشن دراصل عدم استحکام ثابت ہوگا، اس وقت ملک میں ریاست کی رٹ نہ ہونے کے برابر ہے۔

انہوں نے کہا کہ خیبر پختونخوا ہو یا بلوچستان، مسلح تنظیمیں کھلےعام علاقوں کو کنٹرول کررہی ہیں، بلوچستان کا معلوم نہیں مگر خیبرپختونخوا میں پولیس سورج غروب ہوتے ہی تھانوں میں بند ہوجاتی ہے۔

مولانا فضل الرحمان کا کہنا تھا کہ جہاں اجلاس میں وردی والا موجود ہوگا فیصلے وردی والا کرےگا، کیا ہم نے پاکستان اس لیے حاصل کیا تھا کہ ہم جرنیلوں کی غلامی کریں گے۔

جے یو آئی سربراہ نے کہا کہ اسٹیبلشمنٹ کو ہر شعبے میں اپنی بالادستی ختم کرنی ہوگی، آپریشن کا فیصلہ کوئی اور کرے گا ذمہ داری سیاسی جماعتیں اٹھائیں گی، البتہ شہبا زشریف وزیراعظم نہیں وہ صرف کرسی پر بیٹھے ہیں۔

یہ بھی پڑھیں: 

وزیراعظم نے دہشتگردی کیخلاف عزم استحکام آپریشن لانچ کرنے کی منظوری دیدی

عزم استحکام آپریشن؛ حکومت نے اِن کیمرا اجلاس بلالیا

خیال رہے کہ گزشتہ دنوں وزیراعظم شہباز شریف کی زیر صدارت نیشنل ایکشن پلان کی ایپکس کمیٹی کا اجلاس ہوا جس میں انسداد دہشتگردی کے لیے آپریشن عزم استحکام کی منظوری دی گئی تھی۔

نیشنل ایکشن پلان سے متعلق ایپکس کمیٹی کے اجلاس میں آرمی چیف جنرل عاصم منیر، وفاقی وزراء اور چاروں صوبوں کے وزرائے اعلیٰ بھی شریک تھے۔