گرمی میں ناران جانے والے سیاح ہوجائیں تیار، 6 ماہ سے بند ناران شاہراہ کھول دی گئی

سیاحوں کیلئے اچھی خبر آگئی، 6 ماہ کی طویل بندش کے بعد ناران ریزورٹ کو تمام رکاوٹیں دور کرکے سیاحوں کے لیے کھول دیا گیا ہے۔

تفصیلات کے مطابق ڈپٹی کمشنر مانسہرہ عدنان خان کے مطابق ناران جانے والی شاہراہ سیاحوں کے لیے کھول دی گئی ہے جبکہ جھیل سیف الملوک اور بٹاکنڈی اور بابو سرتاپ کو کھولنے کے لیے صفائی کا کام تیز رفتاری سے جاری ہے۔

ٹورازم پروموشن ایسوسی ایشن آف کاغان کے چیئرمین سیٹھ مطیع اللہ نے سیاحوں کو ناران آنے کی دعوت دیتے ہوئے کہا کہ ہماری سڑک 6 ماہ بعد کھلی ہے، ہم اللہ کا شکر ادا کرتے ہیں کہ اس وقت تمام گلیشیئرز کو صاف کر دیا گیا ہے۔

مزید پڑھیں:نیب ترامیم کیس: عمران خان سپریم کورٹ میں ویڈیو لنک کے ذریعے پیش

اس حوالے سے مقامی لوگوں کا کہنا تھا کہ مئی کے مہینے میں ہونے والی غیر متوقع برفباری نے ناران کی خوبصورت خوبصورتی میں اضافہ کر دیا ہے۔ مقامی انتظامیہ نے سیاحوں کو ٹراؤٹ مچھلی کا شکار کرنے کی بھی اجازت دے دی ہے۔

مقامی رہائشی حسن دین کا کہنا ہے کہ آج کل ہر طرف برف باری ہے اور بہت سردی ہے۔ تمام سیاحوں کو اس کا فائدہ اٹھانا چاہئے اور آکر برف سے لطف اندوز ہونا چاہئے۔

اس کے علاوہ ناران کے ریستورانوں نے سیاحوں کے لیے نئے پکوان تیار کیے ہیں۔