لاہور میں ماڈل ٹاؤن کچہری کے متنازعہ نوٹیفکیشن کیخلاف وکلاء کی جانب سے ریلی نکالی گئی جس پر پولیس نے لاٹھی چارج اور شیلنگ کردی۔
تفصیلات کے مطابق وکلاء کی ریلی ہائیکورٹ کے اندر داخل ہونے کیلئے پہنچی تو پولیس نے وکلاء کو روکنے کی کوشش کی، اس موقع پر پولیس اور وکلاء میں شدید تصادم ہو گیا جس کے نتیجے میں متعدد وکلاء زخمی ہو گئے۔
مزید پڑھیں:کراچی میں میٹرک کے امتحانات، دوسرا پرچہ بھی آؤٹ ہوگیا
پولیس کے مطابق احتجاج کرنے والے ایک وکیل کو بھی گرفتار کیا گیا ہے جب کہ ایس پی سول لائنز عبدالحنان کی قیادت میں پولیس کی بھاری نفری ہائیکورٹ میں موجود ہے۔
تاہم پولیس نے لاہور ہائیکورٹ کے تمام داخلی و خارجی گیٹ بند کر دئیے۔ پولیس کی جانب سے شیلنگ اور لاٹھی چارج کے بعد ریلی کے شرکاء منتشر ہو گئے۔
خیال رہے کہ ماڈل ٹاؤن کچہری کے متنازعہ نوٹیفکیشن اور وکلاء کیخلاف دہشت گردی کی دفعات کے تحت مقدمات کیخلاف لاہور میں ایوانِ عدل سے وکلاء کی جانب سے ریلی نکالی گئی۔
