نواز شریف اورمریم نواز کو آج قیدیوں کا یونیفارم دیاجائیگا , قیدی نمبرز دے دیئے گئے

راولپنڈی : ایون فیلڈ کیس میں گرفتار نواز شریف اور مریم کو راولپنڈی کی اڈیالہ جیل میں بی کلاس اور قیدی نمبرز دے دیئے گئے، آج قیدیوں کا یونیفارم دیا جائیگا۔

تفصیلات کے مطابق اڈیالہ جیل میں قید کیپٹن (ر) صفدر اور نوازشریف کو جیل انتظامیہ کی جانب سے بی کلاس الاٹ کردی گئی ہے، نواز شریف اورمریم نواز کو آج قیدیوں کایونیفارم دیاجائیگا۔

اس کے علاوہ اڈیالہ جیل میں مجرم نوازشریف کو عارضی قیدی نمبر3421 اور مریم نواز کو عارضی قیدی نمبر 3422الاٹ کیا گیا ہے۔

جیل ذرائع کے مطابق دیگر سہولیات میں سونے کے لیے بیڈ، ٹی وی، اخبار، روم کولر اور گھر کا کھانا ملے گا، جیل میں نوازشریف، مریم نواز اور محمد صفدر کو ایک ہی کمپاؤنڈ میں رکھا گیا ہے جہاں تینوں کے کمرے الگ الگ مگر ملاقات ہوسکے گی۔

جیل ذرائع کا کہنا ہے کہ بی کلاس میں اےسی میسر نہیں جبکہ پنکھے کی سہولت موجود ہے، کپڑوں کا سوٹ کیس بھی نواز شریف اور مریم نواز کے حوالے کردیا گیا۔

مذکورہ سوٹ کیس شریف خاندان کے دیگرافراد کی جانب سے جیل حکام کو دیا گیا تھا، سوٹ کیس کی مکمل تلاشی کے بعد مجرم نوازشریف اور مریم کےسپرد کیا گیا۔

جیل انتظامیہ نے نوازشریف اور مریم سے ملاقات کیلئے جمعرات کا دن مختص کیا ہے جبکہ نیب کے قیدیوں کی ملاقات جمعہ کو ہوتی ہے۔