برطانوی ٹیم کی ورلڈ کپ میں جاری شاندار کارکردگی کے پیچھے ایک خاتون کا ہاتھ ہے

ماسکو:  برطانیہ کی فٹ بال ٹیم روس میں جاری ورلڈ کپ میں شاندار کارکردگی دکھا رہی ہے اور اس شاندار کارکردگی کے پیچھے ایک خاتون کا ہاتھ ہے جو کھلاڑیوں کے لیے ایسا کام کر رہی ہے کہ سن کر آپ بھی پاکستانی کرکٹ ٹیم کو اس کے حوالے کرنے کی خواہش ظاہر کر دیں گے۔

میل آن لائن کے مطابق 47سالہ ڈاکٹر پیپا گرینج نامی یہ خاتون ماہرنفسیات ہے جو جسم اور دماغ کے باہمی ربط اور یوگا کی کایاپلٹ طاقت پر یقین رکھتی ہے۔ڈاکٹر پیپا روس میں برطانوی ٹیم کے ساتھ ان کے ٹریننگ کیمپ میں رہ رہی ہے اور انہیں ذہنی کمزوری اور نفسیاتی ضعف سے نجات پانے میں مدد دے رہی ہے۔

ڈاکٹر پیپا نے برطانوی کھلاڑیوں کی سمارٹ فون کی عادت کو ختم کر دیا ہے۔ کئی کھلاڑی ’فورٹ نائٹ‘ جیسی موبائل فون گیمز کے عادی تھے۔ ڈاکٹر پیپا نے ان کی یہ عادت بھی چھڑوا دی ہے۔بتایا گیا ہے کہ ڈاکٹر پیپا کھلاڑیوں کو نہ صرف یوگا کروا رہی ہے بلکہ انہیں الگ الگ تنہائی میں بیٹھنے اور سمارٹ فون پر مصروف رہنے کی بجائے باہم چھوٹے چھوٹے گروپوں میں تقسیم کرکے اکٹھے بٹھا دیتی ہے تاکہ وہ آپس میں بات کریں، ایک دوسرے سے اپنی زندگی کی کہانی اور اپنی پریشانیاں دوسروں کو بتائیں تاکہ ان کے ذہن کا بوجھ ہلکا ہو، ان کے ذہن اور جسم باہم مربوط ہوں اور وہ کھیل میں بہتر کارکردگی کا مظاہرہ کر سکیں۔

ڈاکٹر پیپا ٹیم کو کامیابی کے لیے محنت کرنے کی ترغیب کچھ یوں دے رہی ہے کہ اس نے کھلاڑیوں کے کمروں اور جم وغیرہ میں ایسے پوسٹرز لگا دیئے ہیں جن سے محنت کی اہمیت اجاگر ہوتی ہے۔ مثال کے طور پر جم میں لگائے گئے ایک پوسٹر پر لکھا ہے کہ ”کامیابی ملتی نہیں ہے، یہ کمانی پڑتی ہے۔“