اس فیصلے سے نواز شریف کوفائدہ ہوگا، یہ فیصلہ تین مہینے پہلے آنا چاہیے تھا

نواز شریف کیخلاف فیصلے پر سیاسی رہنماؤں کا رد عمل

پاکستان پیپلز پارٹی کے رہنما اور سابق اپوزیشن لیڈر خورشید شاہ نے نواز شریف کے خلاف فیصلے کے ’وقت‘ کو غلط قرار دے دیا۔

فیصلے کے حوالے سے ردعمل ظاہر کرتے ہوئے خورشید شاہ نے کہا کہ اس فیصلے سے نواز شریف کوفائدہ ہوگا، یہ فیصلہ تین مہینے پہلے آنا چاہیے تھا۔

خورشید شاہ نے کہا کہ الیکشن کے وقت یہ فیصلہ کئی معنی نکالے گا،نواز شریف پارلیمنٹ کو اہمیت دیتے اور پاناما کا فیصلہ اسمبلی میں لاتے تو یہ وقت نہ دیکھتے۔

تاریخ میں پہلی بار کسی بڑے کو سزا ہوئی، شیخ رشید

عوامی مسلم لیگ کے سربراہ شیخ رشید نے کہا کہ تاریخ میں پہلی بار کسی بڑے کو سزا ہوئی۔

انہوں نے کہا کہ نواز شریف اللہ کی پکڑ میں آئے ہیں، شاہد خاقان عباسی اور شہباز شریف پر بھی مقدمات ہیں۔

شیخ رشید کا کہنا تھا کہ نوازشریف نے جس عوام کو بنیادی سہولیات سے محروم رکھا ان سے چاہیں گے کہ وہ سڑکوں پر نکلیں۔

ایک فرد کیخلاف فیصلے سے انتخابات آگے پیچھے نہیں ہونے چاہئیں، سراج الحق

امیر جماعت اسلامی سراج الحق نے کہا کہ نواز شریف کیخلاف فیصلہ انتخابات پر اثر انداز نہیں ہونا چاہیے۔

مردان میں گفتگو کرتے ہوئے سراج الحق نے کہا کہ ایک فرد کیخلاف فیصلے سے انتخابات آگے پیچھے نہیں ہونے چاہئیں۔

سراج الحق نے کہا کہ پاناما لیکس کے بعد ہم نے 436 افراد کے نام پیش کردیے تھے، ان افراد کےخلاف عدالتی کارروائی چیونٹی کی رفتار سےبھی کم ہے، قوم چاہتی ہےکہ احتساب ہو تو سب کا ہو۔

اب بڑے بڑے ڈاکو اسمبلی نہیں جیل جائیں گے، عمران خان

عمران خان کا کہنا تھا کہ اللہ کا شکرگزار ہوں 22 سال پہلے یہ جدوجہد شروع کی، پہلی مرتبہ ایک طاقتور کو ملک کے انصاف کےنظام نے سزا دی۔

انہوں نے کہا کہ  پہلے صرف کمزور لوگ جیلوں میں جاتے تھے اور طاقتور لوگوں کو پاکستان کے ادارے نہیں پکڑ سکتے تھے، آج سارے پاکستانیوں کو شکر ادا کرنا چاہیے کیونکہ یہ نئے پاکستان کی شروعات ہے۔

چیئرمین پی ٹی آئی نے کہا کہ اب سے بڑے بڑے ڈاکو اسمبلی میں نہیں جائیں گے اور وزیر نہیں بنیں گے، بڑے ڈاکو اب جیلوں میں جائیں گے، انہیں سزائیں ہوں گی، امید ہے 26 جولائی کو پاکستان میں نئے پاکستان کا سورج  اگے گا

ایسے فیصلوں کا جواب تاریخ دے گی، مریم اورنگزیب

رہنما مسلم لیگ(ن)مریم اورنگزیب نے  کہا کہ مسلم لیگ ن اس فیصلے کو مسترد کرتی ہے، ایسے فیصلے آتے رہے ہیں، تاریخ ان کا جواب دےگی۔

مریم اورنگزیب نے کہا کہ نواز شریف کو نہ پہلے اور نہ اب اس فیصلے سے فرق پڑے گا۔

عوام نواز شریف کے حق میں فیصلہ دیں گے، خواجہ آصف

سابق وزیر خارجہ خواجہ آصف نے سیالکوٹ میں جلسے سے خطاب کرتے ہوئے کہا کہ 25جولائی کو عوام کا فیصلہ آئے گا۔

خواجہ آصف نے کہا کہ اس فیصلے میں پریشانی والی کوئی بات نہیں ہے، عوام نواز شریف کے حق میں فیصلہ دے گی، عوام بھرپور محنت کرکے نواز شریف کے حق میں فیصلہ دے۔

انہوں نے کہا کہ فیصلے کے خلاف ہائیکورٹ اور سپریم کورٹ سے رجوع کیا جائے گا۔

مشورہ ہے نواز شریف آئیں اور اس جنگ کو تیزی سے لڑیں،جاوید ہاشمی

سینیئر سیاستدان جاوید ہاشمی کا کہنا ہے کہ شہباز شریف محنت کررہے ہیں لیکن نوازش ریف کی کمی پوری نہیں ہوسکتی۔

جاویدہاشمی نے کہا کہ مشورہ ہے نواز شریف آئیں اور اس جنگ کو تیزی سے لڑیں، وزیر اعظم پهانسی بهی چڑهے، جیل بهی گئے، قربانیاں دینا پڑتی ہیں۔

انہوں نے کہا کہ نواز شریف واپس آكر عدالتوں كا سامنا كریں، فیصلے سے نواز شریف اور مریم کے لیے ہمدردی کی لہر اٹھے گی، پاكستانی قانون كے تحت سزا پر فوری ضمانت ہوجاتی ہے۔

عدالتی فیصلے کے پاکستانی سیاست پر مثبت اثرات پڑیں گے، فواد چوہدری

تحریک انصاف کے ترجمان فواد چوہدری کا کہنا ہے کہ عدالتی فیصلے کے پاکستانی سیاست پر مثبت اثرات پڑیں گے۔

میڈیا نمائندوں سے غیر رسمی گفتگو کرتے ہوئے فواد چوہدری نے کہا کہ ہمارا مفاد ہے کہ نواز شریف کو سزا ہو اور پیسے بھی واپس آئیں، پاکستان سے جو 3 ہزار کروڑ باہر گئے وہ واپس کیسے آئیں گے یہ اہم ہوگا۔

ترجمان پی ٹی آئی کا کہنا تھا کہ عدالتی فیصلے کے پاکستانی سیاست پر مثبت اثرات پڑیں گے، پاکستان میں طاقتور لوگوں کا احتساب شروع ہوگیا ہے۔

انہوں نے مزید کہا کہ شریف فیملی کو دفاع کا بھرپور موقع ملا۔

خیال رہے کہ احتساب عدالت نے ایون فیلڈ ریفرنس میں سابق وزیراعظم نواز شریف کو 11 اور ان کی صاحبزادی مریم نواز کو 8 جب کہ داماد کیپٹن (ر) صفدر کو ایک سال قید کی سزا سنائی ہے۔

احتساب عدالت کے جج محمد بشیر نے فیصلے میں نوازشریف کو 80 لاکھ پاؤنڈ اور مریم نواز کو 20 لاکھ پاؤنڈ جرمانہ بھی کیا اور ایون فیلڈ اپارٹمنٹس کو ضبط کرنے کا بھی حکم دیا جبکہ عدالت نے کیپٹن (ر) صفدر پر جرمانہ نہیں کیا ہے۔

عدالت نے کہا کہ حسن اور حسین مفرور ہیں انہیں اشتہاری ملزم قرار دیا جائے اور دونوں کے دوبارہ ناقابلِ ضمانت وارنٹ گرفتاری جاری کیے جائیں۔