یوٹیوبر عمران ریاض کی گرفتاری، پھر رہائی، ماجرہ کیا ہے؟

لاہور کی کینٹ کچہری نے یوٹیوبر عمران ریاض کو کار سرکار میں مداخلت کے کیس سے ڈسچارج اور رہا کرنے کا حکم دے دیا۔

تفصیلات کے مطابق لاہور پولیس نے اینکر پرسن عمران ریاض کو جسمانی ریمانڈ کیلئے عدالت میں پیش کیا، پولیس نے موقف اپنایا کہ ملزم کو ایف آئی آر میں نامزد ہونے پر لاہور ایئرپورٹ سے گرفتار کیا گیاتھا۔

لاہور پولیس نے موقف اختیار کیا کہ ملزم کی نشاندہی پر دیگر ملزمان کو گرفتار کیا جا نا ہے، لہذا ملزم کا دس روزہ جسمانی ریمانڈ منظور کیا جائے۔

مزید پڑھیں:یوٹیوبر عمران ریاض کو حج کیلئے جانے سے کیوں روکا گیا؟

عمران ریاض کے وکیل میاں علی اشفاق نے جسمانی ریمانڈ کی پولیس کی درخواست کی مخالفت کرتے ہوئے کہا کہ عمران ریاض پر درج مقدمہ جھوٹا اور بے بنیاد ہے۔جوڈیشل مجسٹریٹ نے عمران ریاض کے ریمانڈ سے متعلق فیصلہ محفوظ سناتے ہوئے اینکر پرسن کو مقدمے سے ڈسچارج کر دیا۔

جوڈیشل مجسٹریٹ نے جاری حکم نامے میں لکھا کہ ایف آئی آر میں درج جرم اور ریمانڈ پیپر کی نوعیت قابل ضمانت ہے، لہذا قانون کے مطابق جسمانی ریمانڈ نہیں دیا جاسکتا اور تفتیشی افسر کی جسمانی ریمانڈ کی درخواست مسترد کی جاتی ہے۔

حکم نامے کے مطابق یہ نوٹ کیا گیا ہے کہ ملزم کے خلاف ثبوت ناکافی ہیں، لہذا عمران ریا ض کو کیس سے ڈسچارج کیا جاتا ہے، تفتیشی افسر کو ہدایت کی جاتی ہے کہ اگر ملزم کسی اور کیس میں مطلوب نہیں ہے تو ان کو رہا کیا جائے۔

عمران ریاض کو لاہور کے علامہ اقبال انٹرنیشنل ایئرپورٹ سے اس وقت حراست میں لیا گیا جب وہ حج کے لیے سعودی عرب روانہ ہو رہے تھے، رواں سال کے اوائل میں انہیں چکوال میں دھربی جھیل کے ٹھیکے سے متعلق کرپشن کیس میں گرفتار کیا گیا تھا۔

اس کے علاوہ عمران خان کو تحریک انصاف کے بانی عمران خان کی زمان پارک رہائش گاہ کے باہر تشدد سے متعلق ایک اور کیس میں دوبارہ گرفتار کیا گیا تھا۔