قومی ٹیم کی کپتانی؟ ملتان سلطانز کے ہیڈکوچ کا بیان آگیا

پاکستان سپر لیگ (پی ایس ایل) میں ملتان سلطانز کے ہیڈکوچ اینڈی فلاور نے قومی ٹیم کی کپتانی سے متعلق اپنی رائے کا اظہار کردیا۔

کرک انفو کو دیئے گئے انٹرویو میں ملتان سلطانز کے ہیڈکوچ اینڈی فلاور نے کہا کہ پاکستانی ٹیم کی قیادت کیلئے لیگ اسپنر شاداب خان اس ریس سے باہر ہوچکے ہیں کیونکہ انکی کارکردگی سوالیہ نشان ہے، ہوسکتا شاہین کو دوبارہ کپتان بنایا جائے لیکن مجھے لگتا ہے کہ گرین شرٹس کیلئے محمد رضوان بہترین آپشن ہوسکتے ہیں۔

انہوں نے کہا کہ کپتانی میں اچانک تبدیلی اور نئے ہیڈکوچ کی آمد نے گرین شرٹس کی کارکردگی کو متاثر کیا ہے، انہوں نے میگا ایونٹ سے قبل بڑی تبدیلیاں کیں، عامر کیساتھ عماد وسیم کو واپس لائے لیکن فائدہ نہیں ہوا۔

مزید پڑھیں: چاہت فتح علی خان کی کرکٹ بورڈ کو بڑی پیشکش

اینڈی فلاور نے کہا کہ گیری کرسٹن بطور ہیڈکوچ ٹیم سے وابستہ ہوئے لیکن ٹیم پہلے راؤنڈ سے باہر ہوگئی، بطور کوچ یہ بہت مشکل آغاز ہے، پاکستانی ٹیم کی باڈی لینگویج سے لگا جیسے گھبرائی ہوئی ہو۔

مزید پڑھیں: بنگلادیش کیخلاف ٹیسٹ سیریز؛ کپتان کون ہوگا؟ بورڈ کا فیصلہ

خیال رہے کہ گزشتہ سال نومبر میں آئی سی سی ورلڈکپ کے بعد بابراعظم نے تینوں فارمیٹ کی کپتانی سے استعفیٰ دے دیا تھا، بعدازاں بورڈ نے شاہین کو ٹی20 جبکہ ٹیسٹ کیلئے شان مسعود کو کپتان بنایا تھا۔

چیئرمین کی تبدیلی کے بعد شاہین کو محض ایک سیریز کا موقع ملا اور ان سے کپتانی لیکر بابراعظم کو دیدی گئی جس سے ٹیم میں اختلافات کی خبریں سامنے آئیں۔

قومی ٹیم نے اس عرصے میں نیوزی لینڈ کی سی ٹیم سے ہوم گراؤنڈ پر سیریز برابر کی، آئرلینڈ کیخلاف بمشکل سیریز جیت سکے اور میگا ایونٹ میں امریکی ٹیم نے انہیں اَپ سیٹ کیا۔