شیخ رشید کا عمران خان کی رہائی سے متعلق بڑا انکشاف

راولپنڈی: شیخ رشید نے انکشاف کیا ہے کہ سربراہ پاکستان تحریک انصاف (پی ٹی آئی) عمران خان کو رہا نہیں کیا جائے گا۔

راولپنڈی کی اڈیالہ جیل کے باہر میڈیا سے گفتگو کرتے ہوئے انکا کہنا تھا کہ آج کوئی فرد جرم عائد نہیں ہوئی، ساڑھے 600لوگوں کو دھوپ میں مارا گیا۔

انہوں نے کہا کہ پراسیکیوٹر سے آج میری لڑائی ہوئی، پراسیکیوٹر نے کہا تھا میں یہاں پیش نہیں ہوں گا، پراسیکیوٹر نے جج کے خلاف عدم اعتماد کیا تھا جو مسترد ہوئی۔

مزید پڑھیں:سینئر سیاستدان شیخ رشید کا آرمی چیف سے 9 مئی کے قیدیوں کیلئے عام معافی کا مطالبہ

شیخ رشید نے کہا کہ کینیا کی فلم پاکستان میں دہرائی جاسکتی ہے، 30 اگست سے پہلے حساب ہو گا، قوم کسی لیڈر کا انتظار نہیں کرے گی، ہر طرف بھوک ہی بھوک ہے، انکا مزید کہنا تھا کہ شہباز شریف نے کہا یہ آئی ایم ایف کا بنایا ہو ا بجٹ ہے۔

عمران خان کی رہائی سے متعلق سوال پر شیخ رشید کا کہنا تھا کوئی بیوقوف ہی سمجھتا ہو گا کہ بانی پی ٹی آئی کو رہا کیا جائے گا، موجودہ صورتحال میں بانی پی ٹی آئی کو رہا نہیں کیا جائے گا۔

یاد رہے اس سے قبل بھی شیخ رشید نے ایک بیان میں کہا تھا ابھی حالات ایسے نہیں ہیں کہ عمران خان کو رہا کیا جائے لیکن بے گناہوں کے جیلوں سے نکلنے تک عزت کے خواہشمندوں کو عزت نہیں ملے گی۔