مقبول خبریں
وزیراعظم آفس تمام ایجنسیوں کو کسی جج سے رابطہ نہ کرنے کی ہدایت جاری کرے، لاہور ہائیکورٹ
![وزیراعظم آفس تمام ایجنسیوں کو کسی جج سے رابطہ نہ کرنے کی ہدایت جاری کرے، لاہور ہائیکورٹ](https://urdu.gtvnewshd.com/wp-content/uploads/2024/06/lhc-1.jpg)
لاہور ہائی کورٹ نے تمام سول اور ملٹری ایجنسیوں کو ہدایت کی ہے کہ وہ کسی جج یا ان کے عملے کے کسی رکن سے رابطہ نہ کریں۔
جسٹس شاہد کریم نے انسداد دہشتگردی (اے ٹی سی) کے جج کو ہراساں کرنے کے معاملے میں 4 صفحات پر مشتمل تحریری عبوری حکم جاری کر دیا۔
جسٹس شاہد کریم نے اپنے تحریری حکم میں کہا کہ مستقبل میں کوئی بھی ایجنسی کسی جج سے رابطہ نہ کرے چاہے وہ اعلیٰ اور ذیلی عدلیہ کا جج ہو یا ان کے عملے کا کوئی رکن ہو۔
حکم نامے میں یہ بھی کہا گیا ہے کہ آئی جی پنجاب کی جانب سے تمام پولیس افسران کو ہدایات جاری کی جائیں کہ وہ ان عدالتوں میں زیر التواء عدالتی کارروائی کے میرٹ کے حوالے سے اعلیٰ عدلیہ کے کسی جج یا ذیلی عدلیہ کے کسی جج سے براہ راست رابطہ نہ کریں۔
لاہور ہائیکورٹ کے فیصلے میں کہا گیا ہے کہ اے ٹی سی کے ججز اپنے موبائل میں ہر کال ریکارڈ کریں، پنجاب کی انسداد دہشتگردی کی خصوصی عدالتیں 9 مئی کے کیسز کا ترجیحی بنیادوں پر فیصلہ کریں۔
خصوصی عدالت کے جج عباس نے الزام عائد کیا تھا کہ اے ٹی سی سرگودھا کے جج کی حیثیت سے ان کے نئے چارج سمبھالتے ہی انہیں پیغام دیا گیا آئی ایس آئی کا کوئی افسر ان کے چیمبر میں ان سے ملنا چاہتا ہے۔