‘امریکی امداد کے بغیر اسرائیل ایک ہفتے قائم نہیں رہ سکتا’

سابق اسرائیلی جنرل نے ایران اور حزب اللہ کے مقابلے میں صہیونی حکومت کو کمزور قرار دیدیا۔

میڈیا رپورٹس کے مطابق سابق صہیونی فوجی سربراہ اسحاق بریک نے کہا ہے کہ صہیونی حکومت خود کو امریکی مدد سے بے نیاز ثابت کرنے کی کوشش کررہی تھی تاہم طوفان الاقصیٰ آپریشن نے ثابت کیا کہ امریکی مدد کے بغیر اسرائیل ایک ہفتہ بھی قائم نہیں رہ سکتا۔

اسرائیلی رزرو فورسز کے سابق سربراہ نے کہا کہ موجودہ حالات میں اسرائیل کو امریکی مدد کی بہت زیادہ ضرورت ہے، گزشتہ 10 مہینوں کے دوران فلسطینی مزاحمتی گروپ سے جنگ کے بعد صہیونی حکومت اندر سے کھوکھلی ہوگئی ہے۔

مزید پڑھیں: اسماعیل ہنیہ کی شہادت؛ سعودی عرب بھی ایران کی حمایت میں آگیا

انہوں نے کہا کہ موجودہ حالت میں اسرائیل کے اندر حزب اللہ اور ایران کا مقابلہ کرنے کی طاقت نہیں ہے، حماس کا خاتمہ تاریخ سب سے بڑا جھوٹ ہے۔

سابق فوجی افسر نے مقامی ٹی وی چینل 14 سے گفتگو کرتے ہوئے کہا کہ ہر روز اسرائیل پر راکٹ اور میزائل فائر ہورہے ہیں ان حالات میں حماس پر غلبہ پانا ناممکن ہے۔

واضح رہے کہ 7 اکتوبر 2023 سے جاری غزہ جنگ میں ابتک 40 ہزار سے زائد فلسطینی شہید ہوچکے ہیں جس میں خواتین اور بچوں کی بڑی تعداد شامل ہے۔