گیس کی قیمتوں میں کب تک اضافہ نہیں ہوگا؟ وفاقی وزیر نے بتادیا

اوفاقی وزیر پیٹرولیم مصدق ملک کا کہنا ہے کہ گیس کی قیمتوں میں آئندہ 3 ماہ تک کوئی تبدیلی نہیں کی جائے گی۔

ایک پریس کانفرنس میں مصدق نے کہا کہ گیس کے موجودہ نرخ دسمبر اور جنوری کے موسم سرما کے مہینوں تک برقرار رہیں گے، یہ فیصلہ حکومت کی جانب سے عوام پر مالی بوجھ کم کرنے کی کوششوں کا حصہ ہے۔

وفاقی وزیر نے کہا کہ گیس کے نرخوں میں کوئی اضافہ نہیں کیا گیا ہے اور حکومت شہریوں پر کسی بھی اضافی اخراجات نہ ڈالنے کے لیے پُرعزم ہے۔

انہوں نے اس بات پر زور دیا کہ اگر ضرورت پڑی تو تمام صوبوں کی مشاورت سے کسی بھی ریلیف اقدامات پر عمل درآمد کیا جائے گا۔

مصدق ملک کا کہنا تھا کہ پنجاب حکومت کی جانب سے 500 یونٹ تک بجلی استعمال کرنے والے صارفین کو 14 روپے فی یونٹ ریلیف دیا جائے گا جس سے 98 فیصد گھرانوں کا احاطہ کیا جائے گا۔

انہوں نے کہا کہ اس سے قبل وفاقی حکومت نے ملک بھر میں 200 یونٹ تک استعمال کرنے والے صارفین کے لیے 50 ارب روپے کی سبسڈی کا اعلان کیا تھا۔

وفاقی وزیر نے سیاسی رہنماؤں پر زور دیا کہ وہ افراتفری پھیلانے سے گریز کریں اور پارلیمانی کمیٹیوں میں تعمیری کردار ادا کریں۔