"ملک کیلئے محدود بالنگ لیکن لیگز کیلئے فٹ! سابق کرکٹر شاداب پر برہم”

قومی ٹیم کے سابق کپتان سلمان بٹ نے لیگ اسپنر شاداب خان کو ٹی20 ورلڈکپ 2024 میں محدود بالنگ کروانے جبکہ لیگ کرکٹ کیلئے این او سی دینے پر ٹیم مینجمنٹ کو آڑے ہاتھوں لے لیا۔

پاکستان کے ٹی20 ورلڈکپ 2024 کے پہلے راؤنڈ سے جلد باہر ہونے کے سابق کرکٹر سلمان بٹ نے اپنی مایوسی کا اظہار کرتے ہوئے کہا کہ شاداب خان نے ٹورنامنٹ میں محض 2 بار 4 اوورز کا کوٹہ مکمل کیا جبکہ پی ایس ایل کے ٹاپ پرفارمرز اسامہ میر اور عثمان قادر کو نظر انداز کیا گیا۔

انہوں نے کہا کہ شاداب خان کا ٹیم میں کردار سمجھ نہیں آرہا ہے، وہ لیگ اسپنر کے طور پر بالنگ نہیں کروارہے جبکہ لوئر مڈل آرڈر میں بیٹنگ بھی نہیں آتی جبکہ دوسری جانب ٹورنامنٹ میں شریک دیگر لیگ اسپنرز میں کلدیپ یادیو، ایڈم زمپا، عادل رشید، کیشو مہاراج، اور تبریز شمسی نے وکٹیں لیں لیکن شاداب ایسا کرنے میں مکمل ناکام رہے۔

مزید پڑھیں: بھارت پر آسٹریلیا کیخلاف میچ میں بال ٹیمپرنگ کا الزام

سلمان بٹ نے کہا کہ ٹی20 میں اسپیشلسٹ اہم ہوتے ہیں، کلدیپ، زمپا، عادل رشید، کیشو مہاراج اور شمسی کو دیکھیں! وہ بیٹنگ نہیں کرتے لیکن میچ ونرز ہیں، اپنے دماغ سے گیندیں کرواتے اور وکٹیں لیتے ہیں۔

واضح رہے کہ ٹی20 ورلڈکپ میں قومی ٹیم کو میگا ایونٹ میں امریکا اور بھارت سے شکست کا منہ دیکھنا پڑا تھا جبکہ آئرلینڈ اور کینیڈا کیخلاف قومی ٹیم بمشکل جیت حاصل کرسکی تھی۔