پاکستان میں منکی پاکس کا ایک اور کیس رپورٹ

اسلام آباد: وفاق کے زیر انتظام وزارت صحت نے تصدیق کی ہے کہ پشاور سے منکی پاکس کا چوتھا کیس سامنے آیا ہے۔

تفصیلات کے مطابق وزارت صحت کے ترجمان کے مطابق متاثرہ شخص کا تعلق خیبر پختونخوا سے ہے۔ ترجمان نے بتایا کہ 47 سالہ شہری کو 29 اگست کو بارڈر ہیلتھ سروسز کے عملے نے علامات کی بنیاد پر الگ تھلگ کردیا تھا تاہم متاثرہ شخص خلیجی ممالک سے آیا ہے۔

مزید پڑھیں:پاکستان نے عالمی اداروں سے منکی پاکس کی ویکسین مانگ لی

ڈاکٹر مختار نے کہا کہ وزارت صحت صورتحال کی باقاعدگی سے نگرانی کر رہی ہے۔ انہوں نے کہا کہ وزارت صحت اور صوبائی حکومتیں پیشگی اقدامات کو یقینی بنانے میں مصروف ہیں۔

نیشنل کوآرڈینیٹر برائے صحت ڈاکٹر مختار بھرت نے کہا کہ تمام ہوائی اڈوں پر اسکریننگ کا موثر نظام کام کر رہا ہے۔

یہ بات قابل ذکر ہے کہ منکی پاکس ایک وائرل بیماری ہے جو مپوک وائرس کی وجہ سے ہوتی ہے۔ اگرچہ وائرس کے قدرتی ذخیرے کی شناخت نہیں ہوسکی ہے، لیکن افریقی چوہوں اور غیر انسانی پرائمیٹس (جیسے بندروں) پر شبہ ہے کہ وہ وائرس کو پناہ دیتے ہیں اور اسے انسانوں میں منتقل کرتے ہیں۔